Қандай қилиб Android смартфонни iPhone қилиш мумкин?

Қандай қилиб Android смартфонни iPhone қилиш мумкин?

Турли хил сабабларга кўра ўз Android смартфонингизни iPhone смартфонлариникидек интерферйсга эга бўлишини хоҳлашингиз мумкин. Ҳа, албатта, бунинг иложи бор. Бир нечта қўшимча иловалар ва созламаларни тўғрилаш билан сиз ўз Android қурилмангизни умуман билинмайдиган даражада iOS кўринишига ўзгартириб олишингиз мумкин. Бунинг учун қуйидаги тўрт иловани ўрнатиш керак. Сизга тақдим қилинаётган тўрт илованинг учтаси битта ишлаб чиқарувчига тегишли ва бу реклама эмас. Иловалар бир нечта вариантлар орасидан хатоликларсиз ишлаши ва бепуллиги учун танлаб олинган.

1. iOS 15 стилидаги лаунчерни ўрнатиш

Google Play Store'дан юклаб олиш учунLauncher iOS 15

Илк қўйиладиган қадам iOS 15 стилидаги интерфейсни берувчи лаунчер дастурни Android учун иловалар дўкони, Google Play Store'дан юклаб олиш бўлиб, ўрнатилганидан кейин уни стандарт интерфейс лаунчери сифатида танлаш керак. Илова ишга туширилганидан кейин смартфонингиз бир неча сониялар ичида 60% iPhone кўринишига эга бўлади. Ўз хоҳишингизга кўра илова ичидан блур эффектларини, фон расмларини ва анимацияларни танлашингиз мумкин.

2. iOS 15 стилидаги бошқарув марказини ўрнатиш

Google Play Store'дан юклаб олиш учунControl Center iOS 15

Иккинчи қилинадиган иш, iOS 15 стилидаги Control Center иловасини ўрнатиш бўлиб, уни ишга туширгандан кейин унга керакли рухсатларни бериш керак. Дастур ёқилганидан сўнг, iPhone стилидаги бошқарув маркази экран ўнг четидан чапга суриш орқали чиқишини кўришингиз мумкин. Таъбингизга кўра илова ичидан унинг жойлашувини пастдан ёки тепадан чиқадиган қилиб олсангиз бўлади.

3. iOS 15 стилидаги экран қулфи кўриниши

Google Play Store'дан юклаб олиш учун: iOS 15 Lock Screen & Notifications

Учинчи қадамда биз iOS15 Lock Screen & Notifications дастури билан экран қулфимиз кўринишини iPhone стилидагига ўзгартирамиз. Илованинг тўғри ишлаши учун смартфонингиз очилишига қўйган ҳар қандай парол, бармоқ изи ёки юзни аниқлаш билан очиладиган қулфларни олиб ташлашингиз керак. Шундан кейин дастур автоматик тарзда ишга тушади ва Ёқиш тугмасини босганингизда iOS стилидаги экран қулфини кўришингиз мумкин.

4. iOS 15 стилидаги клавиатура

Google Play Store'дан юклаб олиш учун: Keyboard iOS 15

Сўнгги қиладиган ишимиз iOS стилидаги клавиатура иловасини юклаб олиш бўлиб, уни ўрнатганингиздан кейин қурилмангиз созламалари орасидан "клавиатура" деб қидиринг ва мавжуд клавиатуралар орасидан iPhone стилидаги клавиатурани стандарт ишлайдиган қилиб белгиланг. Эслатиб ўтамиз, ҳар қандай учинчи томон клавиатура иловалари сиз ҳар бир ёзганларингизни тўплаши мумкин.

Натижага қарайдиган бўлсак, асли Android бўлган смартфон деярли тўлиқ iPhone кўринишига келади. Истасангиз Google Play Store дўконидан калкулатор, изоҳ қолдириш иловаларининг iPhone кўринишидаги аналогини ҳам юклаб олишингиз мумкин.

ЎҚИНГ: iPhone 14 олд камераси янгиланади

 
 
 
 
Сайтимизнинг энг чиройли расмларини Инстаграмдаги саҳифамизда томоша қилинг!