Qualcomm иккита янги Snapdragon чипини тақдим этди

Qualcomm иккита янги Snapdragon чипини тақдим этди

Qualcomm компанияси бугун ўрта тоифадаги Snapdragon 6 Gen1 ҳамда бюджет синфидаги Snapdragon 4 Gen1 чипларини тақдим этди. Snapdragon 6 Gen1 чипи 4 нанометрли, Snapdragon 4 Gen1 эса 6 нанометрли жараён асосида яратилган.

Snapdragon 6 Gen1 чипига эга смартфон 2023 йилда, Snapdragon 4 Gen1 чипли смартфон эса шу йилнинг ўзида сотувга чиқиши кутилмоқда. 

Афсуски, компания икки чипнинг тўлиқ техник кўрсаткичларини ошкор қилмади. Бизга шу маълумки, Snapdragon 6 Gen1 чипининг асосий ядроси 2.2 гигагертсда, Snapdragon 4 Gen1 чипиники эса 2.0 гигагертсда ишлайди. Иккила чипсет ҳам 8 та ядрога эга, аммо улар қайси график процессор билан бирга ишлаши номаълум. 

Компания Snapdragon 6 Gen1 чипининг график унумдорлиги 35%, ҳисоблаш унумдорлиги 40% га ошганини айтмоқда, бироқ бу рақамлар қайси чип билан таққослаганда келиб чиққанини Qualcomm айтмаган.

Snapdragon 4 Gen1 чипининг асосий процессори 15% га тезлашган бўлса, гарфик процессорининг кучи 10% га ошган. Бу рақамлар катта эҳтимол билан янги чипни Snapdragon 480/480+ билан таққослаганда келиб чиқади, чунки компаниянинг ҳозирда 400 сериясида бошқа чипсети йўқ.

Snapdragon 6 Gen1 чипсети HDR тасвир ва 200МП камераларни қўллаб-қувватлайдиган 12 битли Spectra Triple тасвир сигнали проcэссорига эга. Чипнинг сунъий интеллект қобилиятлари ҳам такомиллашган. У 7-авлод Qualcomm сунъий интеллект двигателидан фойдаланади, бу бокеҳ эффекти, умумий ишлаш унумдорлиги ҳамда энергия самарадорлигини оптималлаштиришга ёрдам беради.

Snapdragon 6 Gen1 чипи Wi-Fi 6E боғланишини қўллаб-қувватлайди, шунингдек, у 4-авлод Snapdragon X62 5G модеми билан жиҳозланган.

Qualcomm'нинг сунъий интеллект двигатели Snapdragon 4 Gen1 чипида ҳам мавжуд, аммо бу энг сўнггиси эмас. Янги чип энди 120 гертс частотали FHD+ дисплейларни ўзгарувчан тезликда қўллаб-қувватлаши мумкин. 

Шунингдек, чип 108МП камераларни қўллаб-қувватлайди. Чипда Snapdragon X51 5G модеми бўлганлиги сабаб у ҳам 5G тармоғини қўллаб-қувватлайди, аммо унда Wi-Fi 6E имконияти мавжуд эмас. 

Ушбу чип биринчи бўлиб iQOO Z6 смартфонига ўрнатилиши кутилмоқда. 

ЎҚИНГ: Йилнинг кутилган яна бир камерафони тақдим этилди 

Сайт янгиликларидан доимий хабардор бўлиш учун Телеграм каналимизга қўшилинг!