RedMagic 7 Pro глобал бозорга чиқарилди

RedMagic 7 Pro глобал бозорга чиқарилди

Nubia компанияси ўзининг RedMagic 7 ва RedMagic 7 Pro гейминг смартфонларини шу йилнинг феврал ойида Хитой бозори учун сотувга чиқарган чиқарган эди. Эндиликда компания RedMagic 7 Pro смартфонининг глобал версиясини тақдим қилди. Маҳсулотнинг дунё бозорига чиқарилган версияси Хитой бозори учун чиқарилган 135W тезликда қувватланадиган версиясидан фақат 65W тезликда қувватланиши билан фарқ қилади.

RedMagic 7 Pro ўзининг рақибларидан 6.8 дюймли FHD+, 120Hz, AMOLED туридаги ҳеч қандай тирқишлари бўлмаган ва бармоқ изини аниқлаш сенсорига эга олд экрани борлиги билан ажралиб туради. Албатта, смартфон яширин олд камерага эга ва у 16MP сенсор билан таъминланган. Орқа томонидаги учлик камера сенсорлари эса 64, 8 ва 2 мегапикселни ташкил қилади. Қурилма ўлчами бўйига 166.27 мм, энига 77.1 мм, қалинлиги кўра эса 9.98 мм бўлиб, оғирлиги 235 грамм келади.

Капот остида иккита чипсетга эга: Snapdragon 8 Gen 1 асосий амалларни бажарса, қўшимча ўрнатилган Red Core 1 чипи овоз, RGB чироқлар ва бошқа майда ишлар учун мўлжалланган. Смартфон Android 12 га асосланган RedMagic 5.0 операцион тизимида ишлайди. У гейминг учун мўлжалланган ва албатта унинг қизиб кетиши ҳисобга олинган ҳолда унга тўққиз хил иссиқликни тарқатувчи қатламлар ва 20,000 рпм тезликда ишловчи турбофен ўрнатилган.

Оператив 16GB ва доимий 256/512GB хотирали смартфон 5000 mAh батарея сиғимига эга бўлиб, юқорида айтилганидек глобал версия 65W тезликда USB-C кабелидан зарядланади. Унга иккита SIM карта солиш мумкин ва у 5G ни қўллаб-қувватлайди. Смартфонда бугунги кунда кўплаб янги смартфонларда йўқолиб бораётган 3.5 миллиметрлик симли наушник учун уя ва қутисида қувватлагич адаптери бор.

RedMagic 7 Pro смартфонининг RGB чироқларига эга, 16/256GB хотирали Obsidian модели $799, орқаси шаффоф кўринишда бўлган 16/512GB хотирали Supernova модели эса $899 нархда 22 апрелдан бошлаб жаҳон бозорига чиқарилади.

ЎҚИНГ: Vivo ўзининг илк планшетини чиқарди

Terabayt.uz сайтининг видеолари: Youtube'даги каналимизда!