Redmi Note 11T Pro ва Note 11T Pro+ смартфонлари тақдим этилди
Xiaomi компанияси Redmi Note 11 сериясига яна учта янги смартфонни қўшди. Redmi Note 11T Pro ва Note 11T Pro+ кўплаб техник кўрсаткичлар ва дизайн жиҳатидан бир-бирига жуда ўхшаш. Мисол учун, иккала қурилмага ҳам MediaTek Dimensity 8100 чипи, 64МП асосий камера ва 6.6 дюймли дисплей ўрнатилган.
Pro+ версия 120 ватт қувватлаш технологияси, 4,400 мАс сиғимли аккумулятор ва 512ГБ доимий хотирага эга бўлгани билан оддий Pro версиядан фарқланиб туради. Redmi Note 11 SE эса 90 гертсли экран ва Dimensity 700 чипига эга.
Redmi Note 11T Pro/Pro+
Иккала қурилмага ҳам FHD+ резолюциядаги (2460х1080пх) 6.6 дюймли IPS LCD дисплейи ўрнатилган. Ушбу дисплей 144-30 гертс частоталар орасида ишлайди. Бу ўз навбатида аккумулятор қувватини тежашга ҳизмат қилади.
Экран юқори қисмининг ўртасида 16 мегапикселли селфи камера жойлашган бўлса, орқа панелда 64МП асосий, 8МП ультракенг ва 2МП макро камералар жойлашган.
Смартфонлар MediaTek Dimensity 8100 чипига эга бўлиб, у 8ГБ гача бўлган LPDDR5 тезкор хотира ва 256/512ГБ UFS 3.1 доимий хотира билан интеграллаша олади. Шунингдек, улар Android 12 операцион тизимига асосланган MIUI 13 график қобиғида ишлайди.
Икки смартфон орасидаги фарқ уларнинг қувватланиш имконияти ва аккумулятор ҳажмидадир. Note 11T Pro модели 5,080 мАс сиғимли аккумуляторга эга бўлиб, у 67 ваттда қувват олади. Pro+ модель эса 4,400 мАс сиғимли нисбатан кичикроқ аккумулятор билан жиҳозланган, бироқ у 120 ваттда қувват олади.
Xiaomi'нинг айтишича Pro+ версия тўлиқ қувватланиш учун 19 дақиқа вақт сарфлайди. Компания смартфон ичига Surge P1 чипини ўрнатган бўлиб, у қурилма қувватланётган вақт ҳароратни назорат қилиб боради.
Иккала модель ён томонга ўрнатилган бармоқ изи сканери ҳамда IP53 стандартига эга. Redmi Note 11T Pro ва Pro+ смартфонлари Atomic Silver, Time Blue ва Midnight Black рангларида тақдим этилди. Шунингдек, Note 11T Pro+ моделининг Astro Boy нашри ҳам мавжуд.
Қурилмаларнинг нархи қуйидагича:
Redmi Note 11T Pro
6/128ГБ - 270 доллар
8/256ГБ - 330 доллар
Redmi Note 11T Pro+
8/128ГБ - 315 доллар
8/512ГБ - 375 доллар
Redmi Note 11Т Astro Boy нашри
8/512ГБ - 375 доллар
Смартфонлар 31 май куни Хитойда сотувга чиқади
Redmi Note 11 SE
Ушбу модель FHD+ резолюциядаги 90 гертс 6.5 дюймли LCD дисплейи билан жиҳозланган. Орқа панелда 48МП асосий, 2МП сатҳ камералар жойлашган. Олд панелдан эса 8МП селфи камера ўрин олган.
Қурилма MediaTek Dimensity 700 чипидан ишлайди. Ушбу чипсети 4/8ГБ тезкор ва 128ГБ доимий хотирага эга. Смартфон Android 11 операцион тизимига асосланган MIUI 12 график қобиғида ишлайди. Шунингдек, унга 18 ваттда қувват олувчи 5,000 мАс сиғимли аккумулятор ўрнатилган.
Redmi Note 11 SE модели Shadow Black ва Space Blue рангларда тақдим этилди унинг нархи қуйидагича:
4/128ГБ - 165 доллар
8/128ГБ - 210 доллар
Ушбу модель ҳам 31 май санасида сотувга чиқади.
