Redmi Note 12 смартфонларининг аниқ тақдимот санаси маълум бўлди
Бир неча кун аввал Xiaomi ўзининг Redmi бренди остида янги ўрта-бюджет смартфонлар, Note 12 сериясини чиқаришини расман тасдиқлади. Компаниянинг расмий Weibo саҳифасига жойланган тизер постерлар бўлажак смартфонларнинг қачон тақдим қилиниши ва айрим хусусиятларини ошкор қилди.
Улашилган расмий тизер суратларнинг бирида Redmi Note смартфонлари учун ноодатий бўлган ўзгариш пайқаб қолинди: сериядаги қайсидир модел эгилган дисплейга эга бўлади. Тасвирда фақат биргина модел бундай экранга эга эканлигини кўриш мумкин ва бу катта эҳтимол билан Redmi Note 12 Pro+ эканлиги айтилмоқда. Қолган Redmi Note 12 ва Note 12 Pro моделлари эса текис экран билан жиҳозланади.
Одатда эгилган экранли смартфонлар учун АМOLED дисплейдан фойдаланилади. OLED'дан фарқли ўлароқ, АМOLED компаниялар учун бироз қимматга тушади. Бу эса смартфон нархини ошишига олиб келиши мумкин.
Миш-мишларга кўра, янги смартфонлар Dimensity 1080 чипсети билан чиқарилади, шундай экан уларнинг 200МП камерага эга бўлиш эҳтимоли йўқ эмас. Қолаверса, Redmi Note 12 сериясидаги смартфон 210 Вт тезликда зарядланишни қўллаб-қувватлаши ҳам аввал хабар қилинган эди.
Янги Redmi Note смартфонлари учун Хитойда аллақачон олдиндан буюртма бериш бошлаб юборилган. Гарчи техник хусусиятлари ва нархлари маълум бўлмаган бўлса ҳам, Redmi Note 12 серияси аллақачон "хит" бўлишга улгурди: ҳали тақдим қилинмаган смартфонларни сотиб олиш учун бир неча кунда 320 мингдан ортиқ буюртма берилган. Смартфонлар расман 27 октабр куни тақдим қилиниши кутилмоқда.
ЎҚИНГ: Galaxy смартфонлари учун барқарор версиядаги Android 13'ни тарқатиш бошланди
