Redmi Note 12 серияси қачон тақдим қилиниши расман тасдиқланди

Redmi Note 12 серияси қачон тақдим қилиниши расман тасдиқланди

Xiaomi ўзининг Redmi бренди остида янги смартфонлар, Redmi Note 12 сериясини тақдим қилишга тайёрланмоқда. Маълум бўлишича, улар ҳозирги бозордаги смартфонларда мавжуд бўлмаган икки янги технология билан жиҳозланади.

Redmi'нинг Weibo ижтимоий тармоғига жойланган постерга кўра, Note 12 смартфонлари расман октабр ойида намойиш қилинади. Афсуски, тақдимотнинг аниқ санаси маълум қилинмаган, аммо жорий ой тугашига 10 кунча қолганини ҳисобга олсак, биз янги смартфонлар билан тез кунда танишишимиз мумкин бўлади.

Redmi Note 12 серияси ўзлаштирадиган икки янги технологияга тўхталадиган бўлсак, катта эҳтимол билан уларнинг бири аввал миш-миш қилинганидек, рекорд даражадаги, 210 Вт тезликда қувватланиши бўлади. Таъкидлаш жоизки, ҳозирда iQOO 10 Pro 200 Вт билан энг тез қувватланадиган смартфон бўлиб турибди.

MediaTek яқинда тақдим қилган Dimensity 1080 чипсети эса Redmi Note 12'ларнинг яна бир янги технологияси бўлиши мумкин. Айтиш керакки, ушбу чипсет 200МП сенсорни ҳам қўллаб-қувватлайди, бироқ миш-мишларга кўра, Xiaomi 50МП асосий камера билан чекланиши мумкин.

Янги серия Redmi Note 12, Note 12 Pro ва Note 12 Pro Plus моделларини ўз ичига олади, сўнгги хабарларга кўра эса улар орасига тўртинчи, Redmi Note 12 Pro Extreme/Ultra модели ҳам қўшилиши мумкин.

ЎҚИНГ: Redmi яна бир янги бюджет синфидаги смартфонни тақдим этди