Samsung 5 та янги Galaxy Book 3 ноутбукларини чиқармоқчи
Galaxy S23 смартфонлари билан биргаликда 1 феврал куни Samsung ўзининг янги Galaxy Book 3 сериясидаги ноутбукларини тақдим қилишга тайёрланмоқда. Янги ноутбуклар қатори 5 хил моделни ўз ичига олади ва улар орасида Galaxy Book 3 Ultra флагман модел бўлади. Айтиш керакки, бу бизнинг Samsung'нинг Ultra ноутбуки ҳақида биринчи марта эшитишимиз эмас. Бундан аввал Galaxy Book 3 Ultra постерлари улашилган эди. Бу сафар эса бўлажак ноутбукнинг техник хусусиятлари ҳақидаги маълумотлар тарқалиб кетди.
Маълум бўлишича, Galaxy Book 3 Ultra 16 дюйм ва 2880×1800 пиксел резолюциясидаги AMOLED экранга эга бўлади. Капот остида ноутбук Intel Core i9 процессори, 32ГБ оператив ва 1ТБ PCIe NVMe Gen4 доимий хотираси, ҳамда, Nvidia 4070 график картаси билан жиҳозланган. Улар соатига 76 ватт сарфлайдиган батарея билан ишлайди. Батарея эса 136 Вт тезликда қувватланади. Буларнинг барчаси билан ноутбук оғирлиги 1.8 кг, қалинлиги эса 17 мм бўлади. Миш-мишларга кўра, ноутбук S Pen билан ҳам келиши мумкин, лекин бу хабар тасдиқланмаган.
Шунингдек, қатордаги яна бир модел, Galaxy Book 3 Pro ҳам маълумотлар улашилган: ноутбук 14 ёки 16 дюймда, 16 ГБ RAM ва 1ТБ NVMe SSD доимий хотира билан боғланган Core i5-1340P ва i7-1360P процессорларида таклиф қилинади. Ultra'дан фарқли ўлароқ, Pro модел процессорга интеграциялашган Iris Xe графикасида ишлайди. Шунингдек, Pro моделнинг 14 дюймли вариантлиси 63 ватт/соат, 16 дюймли вариантлиси эса 76 ватт/соат батареяга эга бўлади.
