Samsung бултурги ва бу йилги энг зўр смартфонларини янги версияларда тақдим этяпти (+«жонли» видео)
Жанубий кореялик компания Galaxy S20 флагманларини тақдим қилганидан сўнг бултурги моделларга қайта мурожаат этишини ҳеч ким кутмаган бўлса керак. Лекин Samsung шундай йўл тутди – Европа бозорига Galaxy S10 Plus моделини янги талқинда тақдим этяпти.
ЎҚИНГ: Samsung смартфонлари эгаларига расмий хушхабар бор
Айни дамгача мазкур бозорга доимий хотираси 128 гигабайтлик бўлган Galaxy S10+ модели корпусининг рангига кўра уч хил – оқ «перламутр», қора «оникс» ва яшил «аквамарин» вариантларда чиққан. Унинг керамик корпусли вариациялари эса оқ ва қора корпусларда тақдим этилган, аммо улар фақат 512 гигабайт ва ҳатто 1 терабайт ҳажмли ички хотирага эга ва ўта қиммат ҳам.
Машҳур тармоқ информатори Роланд Квандт (Roland Quandt) маълум қилишича, Европада тез орада керамик корпусли Galaxy S10+ арзонроқ версияда – 128 гигабайтлик доимий хотира билан сотувга чиқади. Уни ҳам оқ ёки қора корпусларда сотиб олиш мумкин бўлади, аммо нархи ҳозирча аниқ эмас.
Эслатиб ўтамиз, Samsung’нинг айни дамдаги энг зўр смартфони – Galaxy S20 Ultra автономлик тестида iPhone 11 Pro Max’ни зўрға енгган, лекин барибир унинг ўтган йилги флагмани – Galaxy S10+ ғолиб чиққан!
Шу билан бирга, етакчи смартфонсоз ўзининг Galaxy S20 Ultra 5G флагманини ҳам янги версияда – оқ корпусда тақдим этяпти. Машҳур инсайдер Ice Universe унинг биринчи «жонли» видеосини ҳам эълон қилди:
The Samsung Galaxy S20 Ultra white version will be sold in the global market soon. pic.twitter.com/32ZkbfHBRp
— Ice universe (@UniverseIce) April 29, 2020
Gizchina нашрининг ёзишича, оқ тусли Samsung Galaxy S20 Ultra 5G смартфони Хитойда эртага – 1 май куниёқ сотила бошлайди. Ice Universe таъкидлашича, тез орада уни Европа ва бошқа мамлакатлар бозорларига ҳам чиқаришади.
Дарвоқе, айни шу Galaxy S20 Ultra флагмани DxOMark рейтингида Samsung’ни шарманда қилган.
ЎҚИНГ: Galaxy S20, S20+ ва S20 Ultra’ларнинг барча фарқларини биттада кўриб чиқамиз