Samsung Galaxy A30s ҳамда Galaxy A50s тақдим қилинди.

Samsung Galaxy A30s ҳамда Galaxy A50s тақдим қилинди.

Samsung компанияси A сериясининг янгилинган смартфонлари Galaxy A30s ва Galaxy A50s’ни тақдим қилди. Таъкидлаш жоизки, A50 модели ўтган чоракда Европада барча рақобатчиларини ортда қолдирган ҳолда, энг кўп сотилган смартфонга айланганди.

Шундай қилиб, смартфонлар барча кутганидек бўлиб чиқмади – яъни, платформа ўзгармаган. Демак, эски смартфонларни самарадорлик туфайли янгисига алмаштиришдан маъно йўқ.

Galaxy A30s модели Exynos 7904 процессорини сақлаб қолган, экран ҳам аввалгидек 6,4 дюмли Super AMOLED. Энг қизиғи агар Samsung’га ишонадиган бўлсак дисплей аниқлиги Full HD+ ўрнига HD+’га ўзгарган. Бу сайтдаги хатолик бўлиши ҳам мумкин.

Аммо, энди ушбу моделда бармоқ изи сканери Galaxy A50’даги сингари дисплейнинг ўзида жойлашган. Шунингдек, смартфонга A50’нинг учталик асосий камераси ўрнатилган. У 25, 8 ва 5 МПлик датчикларни ўз ичига олган. Бу фақат яхшиликка деганлар адашади, айрим суратларни A50’дан кўра A30 яхшироқ олганлигини кўрганмиз. Олд камера ҳам 16 МПгича қолган.

Тезкор хотира ҳам ўзгармаган – 3 ёки 4 ГБ. Доимий хотира эса 32 дан 128 ГБ гача бўлиши мумкин. Аккумулятор ҳам 4000 мА/соат кўрсаткичда қолган. 15 ваттлик тезкор қувватлаш режими ҳам мавжуд. Корпус ҳам деярли ўзгармаган ва 166 грамм оғирликда корпус ўлчами 158.5 x 74,7 x 7,8 мм ни ташкил қилган. Фақат, орқа панел энди ўзгача жилоланади.

Galaxy A50s эса янада камроқ ўзгаришларни бошдан кечирган. Унда экран (Full HD+), хотира (4 ёки 6 ГБ тезкор ва 54 ёки 128 доимий), платформа (Exynos 9610) ва аккумулятор (4000 мА/соат) ўзгаришсиз қолган. Шундай экан, ягона асосий янгилик бу камерага тегишли.

 

Олд камера 25 МП ўрнига 32 МП’га ўзгарган. Асосий учталик камера 48, 5 ва 8 МПлик датчиклардан ташкил топган – яъни, асосий датчик ўзгарган. Агар Galaxy A50 айрим рақобатчиларига камера борасида ютказган дейдиган бўлсак, янгиланган модел бу борада муаммоларга учрамаса керак.

Хулоса ўрнида айтиш мумкинки, Galaxy A50s барча параметрларини сақлаган ҳолда фақат камера яхшиланишига эришган. Galaxy A30s эса дисплей ости бармоқ изи сканери ва янги камерага эга бўлган. Агар пресс-релизда хатолик йўқ бўлса, унда Galaxy A30s’нинг экрани аниқлиги аввалгига қараганда ёмонлашган. Смартфонлар сентябр ойидан сотувга чиқарилишини тахмин қилмоқдамиз.

ЎҚИНГ: Terashop.uz’да барча Samsung смартфонлари нархлари билан танишинг (2019 йил 20 август)