Samsung Galaxy қурилмаларидан файлларни чоп этиш янада қулайлашди

Samsung Galaxy қурилмаларидан файлларни чоп этиш янада қулайлашди

Samsung компаниясининг янгиланган Print Service иловаси эндиликда Mopria Print Library хизматини қўллаб-қувватлайдиган бўлди. Энди Samsung Galaxy сериясидаги гаджетлар эгалари турли файлларни бевосита қурилмадан ҳар хил маркадаги (тахминан 88 миллион) принтерлардан чоп этишлари мумкин. Ҳатто бунинг учун фойдаланувчилардан ташқи дастур ва драйверларни юклаш талаб этилмайди.

Фойдаланувчилар ҳужжатларни тўғридан-тўғри электрон почта, галерея ёки браузердан босиб чиқаришлари мумкин. Аввалроқ материалларни қурилмадан чоп этиш учун ҳар битта муайян ишлаб чиқарувчига мўлжалланган ташқи иловаларни юклаб олиш сўраларди.

4PDA нашрининг ёзишича, Samsung Print Service иловасининг янгиланган версияси сўнгги прошивка янгиланиши билан автоматик тарзда Galaxy S4, S5, S6 ва S7 моделларига юкланган. Қолган Galaxy туркумидаги гаджетлар фойдаланувчилари эса илованинг охирги версиясини Google Play’дан юклаб олишлари ёки янгилашлари мумкин. Иловани қўллаб-қувватлаш учун қурилманинг дастур прошивкаси Android 4.4 KitKat версиясидан эски бўлмаслиги керак.