Samsung ва Philips ўз телевизорларида 3D технологиясидан воз кечади

Samsung ва Philips корпорациялари ўз телевизорларида 3D технологиясини қўллашдан воз кечишларини маълум қилди. Бу ҳақда Forbes’га асосланиб, TJournal хабар бермоқда.

2016 йилдан икки компаниянинг янги телевизорлари 3D функциясисиз чиқарилади. Бу талабнинг пастлиги, шунингдек, ушбу форматга мўлжаллаб тайёрланадиган контентнинг озлиги билан тушунтирилди.

«3D ўлди. У ростан ҳам ҳеч кимга керак эмас. Яна у телевизорларни жуда мураккаблаштириб юборади. Технология шунчаки истеъмолчиларнинг талабларига жавоб бермайди», — деди Philips’нинг маҳсулотларни режалаштириш бўйича директори Дэнни Тэк.

Бошқа компаниялар ҳам 3D TV ишлаб чиқариш ҳажмини камайтирмоқда. 2016 йилда LG бундай телевизорларни 2015 йилгига нисбатан икки баробар камроқ ишлаб чиқаради, Sony эса технологияни фақат топ моделларида қолдиради.

Шунга қарамай, 3D-кинотеатрлар анчайин даромадли бизнесга айланиб улгурган, шу боис ушбу технологиянинг бутунлай йўқолиб кетиши эҳтимолдан узоқ, деб ҳисоблайди мутахассислар.

Манба: Daryo.uz