Секундига 5 Гб/с - бу Wi-Fi 7
Бир неча кун олдин Intel ва Broadcom компаниялари биргаликда янги авлод Wi-Fi стандартининг ишлашини кўрсатиб берувчи кичик тақдимот ўтказишди. Intel ходими Карлос Кордейро ва Вижай Нагаражан, Broadcom симсиз уланиш бўлими вице-президенти иштирокида ўтказилган тадбирда Wi-Fi 7 тезлиги билан Wi-Fi 6/6E тезлигини таққосланди.
Intel Core процессори ўрнатилган ноутбукларда Broadcom'нинг Wi-Fi 7 демосининг кириш нуқтасига уланган ҳолда ўтказилган синовда янги авлод Wi-Fi стандарти ҳаво орқали сониясига 5 Гб/с барқарор тезликда ишлаши маълум бўлди. Бу аввалги Wi-Fi 6 авлодидан 5, Wi-Fi 6E авлодидан эса 2.5 баробар тезроқ бўлиб, у бундан ҳам тезроққа чиқиши мумкин.
Маълум бўлишича, Wi-Fi 7'нинг бундай катта тезлиги симсиз АR/VR қурилмаларидан фойдаланиш, 16К'гача бўлган ўта юқори сифатли видеоларни стрим қилиш, уй ёки офисда бир нечта уланган қурилмалар билан ҳам супер-силлиқ ҳолатда ўйинлар ўйнаш имконини беради.
Wi-Fi 7'ни қўллаб-қувватлайдиган қурилмалар 2023 йилнинг иккинчи ярим чоракларида чиқиши мумкин. Айтиш керакки, Intel раҳбари Wi-Fi 7 ўрнатилган компютерлар 2024 йилгача чиқарилишини маълум қилган эди.
