Шифокор iPhone 13 Pro Max'дан бутунлай ўзгача мақсадда фойдаланди
iPhone 13 Pro Max'нинг янги функцияларидан бири смартфонга янги макросёмка режимининг қўйилганлигидир.
ЎҚИНГ: Энг арзон iPhone 13 смартфони Galaxy камерафонидан устун келди: DxOMark рейтинги
Яхши биласиз, макро камерадан фойдаланиб, объектларни жуда яқиндан суратга ва видеога олиш мумкин. Аксарият фойдаланувчилар бундан табиатнинг ўзига хосликларини кадрга муҳрлашда фойдаланса, доктор Томми Корн iPhone 13 Pro Max'нинг макросёмка функциясидан кўзни муолажа қилишда ҳам ишлатиш мумкинлигини аниқлади.
LinkedIn'даги постида офтальмолог янги iPhone'идан фойдаланиб, беморлар кўзини текшираётганини маълум қилди. Макросёмка сабаб Корн кўзнинг ўта муфассал тасвирини ола олган ва ундан фойдаланиб, бемор саломатлиги борасидаги муҳим маълумотларни қайд этган.
Шифокор шох парда трансплантациясини бошдан ўтказган ва тикилган чок битаётганини мунтазам текшириб туриш керак бўлган бемор ҳолатини мисол қилиб келтиради.
«Кўзнинг МАКРО тасвирларини олиш учун шу ҳафта ичи iPhone 13 Pro Max'дан фойдаланиб келяпман. Қойил қолдим. Смартфон офтальмология ва телемедитсина соҳасида инновация қилди. [Янги технология] келажакда қандай тус олишини билишни интиқиб кутяпман... Фотолар шох парда трансплантациясидан кейинги битаётган чокларни кўрсатади. Суратларни эълон қилиш учун [бемордан] розилик олинган. PS: бу «Pro камера»да телефон иловаси ҳам бор!»
Окулист Жеффри Льюис ва Томми Корн iPhone телемедитсинани ривожлантиришга анча ҳисса қўшишини таъкидламоқда.
Смартфонда янги камера режими бўлса-да, Apple янги iPhone'ларни махсус макро камера билан жиҳозламаган. Макро камера ўрнига iPhone 13 Pro ва iPhone 13 Pro Max f/1.8 диафрагма ва 120 даража кўриш бурчагига эга ультракенг бурчакли камерадан фойдаланиб, 2 см масофадаги объектларнинг макро тасвирларини ҳосил қилади.
