Snapdragon 870 чипи ва 144Hz дисплейли iQOO Neo5 Lite смартфони тақдим қилинди

Snapdragon 870 чипи ва 144Hz дисплейли iQOO Neo5 Lite смартфони тақдим қилинди

vivo компанияси март ойида iQOO Neo5 смартфонини тақдим этган эди, энди эса ушбу моделнинг арзонроқ талқини — iQOO Neo5 Lite олам юзини кўрди.

ЎҚИНГ: vivo V21 серия смартфонлари тақдим қилинди

Neo5 сингари Lite версия модель ҳам Snapdragon 870 чипида, Android 11 базасидаги OriginOS тизимида ишлайди, 16МП селфи камера билан жиҳозланган. Иккала модель ўртасида бошқа ўхшашлик йўқ.

iQOO Neo5 Lite 6.57" FullHD+ 144Hz LCD панелга эгалиги боис бармоқ изи сканери ён томонга ўрнатилган; стандарт Neo5 эса 120Hz AMOLED дисплейга эга ва бунда бармоқ изи сканери экран остида жойлашган.

Моделлар ўртасидаги яна бир тафовут аккумулятор борасида кўринади. Neo5 4,400 мАс аккумуляторга эга бўлиб, 66 ваттда қувват олса, Lite талқин 4,500 мАс сиғимли 44 ваттда зарядланувчи аккумулятор билан жиҳозланган. vivo'нинг таъкидлашича, янги смартфон 30 дақиқада 70% заряд йиғади.

iQOO Neo5 Lite'нинг орқа панелига учта камера ўрнатилган: 48МП асосий, 8МП ультракенг ва 2МП макрообективлар.

Смартфоннинг қолган техник жиҳатлари қаторига стерео карнайлар, Multi-Turbo 5.0, иссиқликни ёйиш учун 11 қатламдан иборат суюқликли совутиш тизими, USB-C NFC ва 5G алоқаси киради. Қурилма, шунингдек, фойдаланувчи амалиётини яхшилаш учун UFS 3.1 типидаги доимий хотиранинг 3ГБ ҳажмидан оператив хотира сифатида ҳам фойдалана олади.

iQOO Neo5 Lite икки хил ранг ва уч хил хотира конфигурациясига эга — 8ГБ/128ГБ, 8ГБ/256ГБ ва 12ГБ/256ГБ. Нархи эса хотира сиғимига мос равишда 355, 390 ва 420 долларни ташкил қилади. Смартфонни vivo'нинг расмий вебсайти орқали Хитойда сотиб олиш мумкин. Қурилманинг бошқа мамлакатларда сотувга чиқиш-чиқмаслиги ҳозирча номаълум.

ЎҚИНГ: «iQOO 7, тахтни бўшат!» – AnTuTu’да янги рекордчи пайдо бўлди