Tecno компанияси ўз портфолиосига илк букламафонини қўшди

Tecno компанияси ўз портфолиосига илк букламафонини қўшди

Apple ва Google каби техногигант компаниялар ҳали ҳам биргина букламафон чиқара олмаётган бир вақтда Хитойнинг кичик брендларидан бири, Tecno ўзининг илк букланадиган смартфонини тақдим қилди. MWC 2023 кўргазмасида намойиш қилинган Phantom V Fold букламафони Samsung компаниясининг Galaxy Z Fold модели каби китоб шаклида очилиб ёпилади.

Tecno Phantom V Fold смартфони букланган ҳолатда 6.42 дюймли LTPO AMOLED олд экранга эга. У 1080×2550 пикселлар ўлчамида бўлиб, 120 герц янгиланиш тезлигини қўллаб-қувватлайди.

Букламафонни очганингизда эса 2000×2296 пиксел ўлчамдаги 120 герц янгиланиш тезлигига эга 7.85 дюймли LTPO ички экранни кўрасиз. Гарчи бу Xiaomi'нинг Mix Fold 2 ёки Honor'нинг Magic V ёки Vivo'нинг X Fold+ букламафони экрани кичик бўлса ҳам, у Samsung'нинг Galaxy Z Fold 4 экранидан каттароқдир.

Phantom V Fold орқа томонидаги юмалоқ камера оролида учлик камера тизими жойлашган: асосийси 50 MP, иккинчиси ҳам 2× зум қобилятига эга 50 MP, учинчи ултра-кенг сенсор эса 13 MP. Иккита селфи камеранинг бири ташқи олд экранда жойлашган 32 MP сенсор бўлса, яна бир ички катта экраннинг ўнг томони юқори марказига ўрнатилган 16 мегапикселлик сенсор ҳисобланади.

Қурилма 4 нанометрли Dimensity 9000+ чипсетида Android 13 га асосланган HiOS 13 операцион тизимида ишлайди. Батареяси эса 5000 мА/соат бўлиб, у 45 Вт тезликда сим орқали зарядланади (симсиз қувватлаш имконияти мавжуд эмас). Компаниянинг ўзининг Phantom V Fold букламафони 15 дақиқада 40%, 55 дақиқада эса тўлиқ қувватланишини таъкидлайди.

Букламафонлар бозорига кундан-кунга янги ўйинчилар қўшилиб борар экан, уларнинг нархи табиий равишда камайишни бошлайди. Tecno Phantom V Fold ҳозирги Galaxy Z Fold 4 дан деярли ярим нархга арзон:

  • Tecno Phantom V Fold (12/256 GB) – 89,999 рупия ёхуд 1099 доллар
  • Tecno Phantom V Fold (12/512 GB) – 99,999 рупия ёхуд 1222 доллар

Қурилма жорий йилнинг иккинчи чорагида биринчи бўлиб Ҳиндистонда сотувга чиқарилиши кутилмоқда.

Сайт янгиликларидан доимий хабардор бўлиш учун Телеграм каналимизга қўшилинг!