Telegram Premium нархини "келиштирсак" бўладими?
Бир неча ойлардан бери миш-миш бўлиб келаётган Telegram Premium обунаси ваниҳоят навбатдаги илова янгиланиши билан барча асосий платформалар: iOS, Android, Windows ва macOS учун ҳам чиқарилди. Тўғри, пуллик обуна Android ва Windows учун бироз кечикди, лекин энди ҳаммаси жойида ва агар сизда сўнгги версиядаги илова бўлса ҳозироқ Premium обунага аъзо бўлишингиз мумкин.
Бироқ, биз рақамли маҳсулотларга, айниқса, обуналарга пул тўлашни унчалик ёқтирмаймиз, чунки улар кераксиз ва қимматдек туюлади, лекин у бироз арзонроқ бўлса, албатта, ҳеч бўлмаса бир марта синаб кўришга арзийди. Қисқаси, агар Telegram Premium'га обуна бўлишни режалаштираётган бўлсангиз, сиз уни бироз бўлсада арзонроққа олишингиз мумкин. Қандай қилиб дейсизми? Ўқишда давом этинг.
Аслида Telegram Premium учун ойига 3.99 доллар (44 минг сўмга яқин) нарх белгиланган, лекин сиз уни Apple Store ёки Google Play Store орқали юклаб олинган илова орқали сотиб олмоқчи бўлсангиз сиз 4.99 ёхуд 5 доллар (55 минг сўмга яқин) тўлашингиз керак. Нега десангиз, бу илова дўконлари улар орқали амалга оширилган сотувлар учун маълум миқдорда комиссия ушлаб қолишади: Apple 30%, Google 15%.
Лекин сиз бу комиссияларни Premium учун очилган махсус, верификацияланган бот орқали айланиб ўтишингиз ва обунага 3.99 доллар тўлашингиз мумкин. Premium обуна сотиб олиш учун чиқарилган ушбу бот ишончли бўлиб, у Donate боти ишлаб чиқарувчилари томонидан чиқарилган.
Айтиш керакки, App Store ёки Play Store орқали юклаб олинган Telegram билан сиз илова ичида Premium ботдан пуллик обунага аъзо бўлолмаслигингиз мумкин. Бунда сизга компютер ёки Android смартфон бўлади.
Гап шундаки, Android смартфон учун Telegram иловасини сиз унинг расмий сайти, telegram.оrg'дан тўғридан тўғри юклаб олиб, ўрнацангиз бўлади ва у Google Play Store қоидаларидан ташқарида бўлгани учун ҳам унда Premium'га обуна бўлишда ҳеч қандай комиссия олинмайди. Шунингдек, компютер учун Telegram иловаси ёки Windows учун ишончли Telegram клиенти бўлган Unigram ҳам ҳеч қандай комиссияларсиз ишлайди ва улар билан Premium'га аъзо бўлиш 3.99 долларга тушади. Иккала қурилмаларда ҳам сиз Premium обунага бот орқали аъзо бўла оласиз.
Эслатиб ўтамиз, Telegram Premium бир марталик эмас, балки ойлик тўловли обунадир.
