ТераТавсиф: Xiaomi Mi Note 10 Lite (2-қисм)

ТераТавсиф: Xiaomi Mi Note 10 Lite (2-қисм)

Xiaomi Mi Note 10 Lite'га бағишланган олти қисмдан иборат тавсифимизнинг иккинчи қисмига хуш келибсиз. ТераТавсифнинг бошқа қисмлари билан бу ерда танишинг.

Қуйида смартфоннинг дизайнига тўхталиб ўтамиз.

Mi Note 10 Lite смартфони ўрта тоифанинг юқори синфига мансуб моделларга хос классик услубда ишланган. Қурилма ён томонлари алюминийдан, олд ва орқа томони эса шиша панелдан ишланган. Ромлар ярқироқ сайқалга эга. Олд ва орқадаги шишалар Corning компаниясининг Gorilla Glass 5 шишасидир.

Олд томонидан қаралганда, Lite модели Mi Note 10'нинг айни нусхаси эканини кўриш мумкин. Ҳар икки девайс бир хил — 6,47 дюймли чиройли AMOLED дисплейга эга. Экран ён томонлари бироз қайрилган. Селфи камера учун «U» шаклидаги тирқиш очилган. Тирқишдан юқорига эса иккилмачи карнай (динамик) ўрнатилган.

Панелнинг ҳар икки ён ва юқори томонларидаги ҳошиялар бир хил даражада ингичка, лекин экран қуйисидаги ҳошия нисбатан қалинроқ. Бироқ, умуман олганда, ҳошия қалинлигини флагман моделларга мос даражада ингичка дейиш мумкин.

Дисплей остида эса биометрик аутентификация учун оптик бармоқ изи сканери жойлашган. Датчик тез ишлайди. Бармоғингизни экранга теккизишингиз билан қулф экрани очилади, аммо сканерни узоқроқ вақт босиб турсангиз, тезкор функциялар жамланмаси очилади.

Ромлар ҳам Mi Note 10'даги билан бир хил. Ҳеч нарса ўз жойидан силжимаган. Қувват ва овоз назорати тугмалари ўнг томонга, бош ёки кўрсаткич бармоқ билан ортиқча ҳаракатларсиз фойдаланса бўладиган қилиб, жойланган. Ўнг томон пастки қисмида эса иккита нано-SIM карта учун слот бор; афсуски, бу ерда microSD картага ўрин йўқ. Смартфоннинг чап томонида эса ҳеч нарса мавжуд эмас.

Қаҳрамонимизнинг пастки томонини эса ўртадан USB-C порти, чап томондан динамик ва асосий микрофон, ўнг томондан эса 3.5 мм аудио жек уй қилган. Ушбу портлар бир чизиқ бўйлаб текис жойланмаган ва бу баъзиларга қийинчилик туғдириши ёки ёқмаслиги мумкин.

Қурилмамизнинг «бош» қисмида эса иккинчи микрофон ва пульт учун инфрақизил бластер жойлашган.

Ва ниҳоят орқа томонга ҳам навбат келди. Орқа панелда Mi Note 10 ва Note 10 Lite ўртасидаги фарқлар кўзга ташланади. Mi Note 10'даги 3+1+1 усулида жойлашган камералар ўрнига бу сафар 4 та камера қўйилган ва барча линзалар битта модул ичига, битта шиша остига ўрнатилган. Тўртталик LED чироғи ҳар икки смартфонда бир хил, фақат енгилроқ моделимизда бу чироқлар камера модули ёнидаги қора майдон ичига қўйилган ва камералар билан бирлаштирилган. Тан олиш керак, Mi Note 10'даги сочиб ташланган камералар дизайни яхши чиқмади, Lite'даги янгича ёндашув эса бизга маъқул.

108 мегапикселлик асосий камера ўрнатилмагани боис ҳам Lite'нинг камера модули унчалик қалин эмас. Камералар корпусдан бўртиб чиқмагани сабабли смартфонни текис юзага қўйсангиз, қимирлаб турмайди.

Xiaomi логотипи эса чап томон қуйисига туширилган. Ўнг томондан унчалик ҳам кўримли бўлмаган доимий, расмий ёзувлар ўрин олган.

Биз тавсифимизда Midnight Black (Ярим тун қоронғиси) рангидаги моделдан фойдаланмоқдамиз, аммо корпус умуман қора эмас. Балким, бу ранг Шимолий Қутб доирасидаги тун рангини акс эттирар. Бу билан бу ранг бизга ёқмади, дейишдан узоқмиз. Шунчаки, корпус қора рангда эмас, балки ёруғлик тушишига қараб кўк ёки кулранг тусларда товланади.

Орқа панель шишаси ялтироқ қилиб сайқалланган. Бу эса бармоқ изи доғлари корпусга чиқиб қолади, деганидир. Аммо корпус ранги нурни яхши қайтаргани сабабли бармоқ излари унчалик ҳам яққол кўринмайди.

Mi Note 10 Lite 157.8 х 74.2 х 9.7 мм катталикда. Унинг Lite бўлмаган «ака»си ҳам айни ўлчамга эга. Бироқ техник жиҳатдан енгилроқ моделимиз моддий жиҳатдан ҳам Mi Note 10'дан енгилроқ, 4 граммга. Ваҳоланки, нақ 204 г тош босувчи қаҳрамонимизни енгил деб бўлмайди. Бунга сабаб қилиб 5,260 мА/соат сиғимга эга аккумуляторни келтириш мумкин. Аккумулятор ҳажмини инобатга олсак, қурилма вазнининг оғирлигига кўз юмиш мумкин. Смартфон деярли 10 мм қалинликка эга, аммо ён томонлар қайрилма бўлгани сабаб бу унчалик ҳам сезилмайди. Ҳам орқа томони, ҳам олд томони қайрилгани учун қаҳрамонимиз, аслида, ингичкароқ кўринади.

ЎҚИНГ: ТераТавсиф: Xiaomi Redmi Note 9 Pro (2-қисм)

Хулоса

NOTEBOOKCHECK

8.8балл

Xiaomi Mi Note 10 Lite yuqori toifaga mansub «aka»si Mi Note 10 bilan deyarli bir xil darajada kuchli va bir xil texnik jihatlarga egaligi bois qurilma nomidagi «Lite» so‘zi foydalanuvchiga smartfon haqida ma'lumot berishdan ko‘ra ko‘proq chalg‘itadi. Xiaomi faqatgina kamera moduliga o‘zgartirishlar kiritgan, biroq 108MP o‘rniga qo‘yilgan 64MP kamera ham maqtovga loyiq. Mi Note 10 Lite anchayin arzon; bu borada «Lite» jumlasi smartfonga mos keladi.

DIZAYN

DISPLEY

KAMERA

FUNKSIYAVIYLK

FOYDALANISHGA QULAYLIGI

ALOQA

SAMARADORLIK

AKKUMULYATOR

Қаердан сотиб олиш мумкин?

Asaxiy 3 150 000 сўм Сотиб олиш
Radius 3 380 000 сўм Сотиб олиш
Mediapark 3 485 000 сўм Сотиб олиш

 Афзаллиги

  • Katta va yorug‘ AMOLED ekran
  • HDR10
  • A'lo darajadagi akkumulyator avtonomligi
  • Tezkor quvvatlash
  • Yaxshi yorug‘likda sifatli tasvirlar
  • A'lo darajadagi video stabilizatsiyasi
  • Foydalanishga qulay MIUI interfeysi
  • Apdeytlarning tez-tez kelishi
  • 3.5 mm audio jek
  • FM radio
  • Infraqizil blaster

 Камчилиги

  • Telefoto kamera mavjud emas
  • Past yorug‘likda kamera sifati ko‘ngildagidek emas
  • Selfilar sifati a'lo darajada emas
  • microSD karta sloti yo‘q
Terabayt.uz сайтининг видеолари: Youtube'даги каналимизда!