Tesla'ни синдириш осон эмас!
Tesla бош директори Илон Маскнинг ўз Twitter саҳифасида айтишича, глобал таъминот занжири муаммолари ва Tesla'нинг Шанхайдаги заводининг қисқа муддат ёпилгани билан 2022 йил биринчи чораги "ўта оғир" бўлганига қарамай, компания январ-март ойларида 310 048 та автомобил етказиб берган дея хабар бермоқда The Verge нашри CNBC берган маълумотларга таяниб.
Tesla матбуот хизматининг хабар беришича, Tesla Model 3/Y электромобилларидан 295,324 та, Модел S/Х дан эса 14,724 та етказиб берилган. Таъкидлаш керакки, ўтган йилнинг худди шу биринчи чорагида етказиб берилган (184 800 та) Тесла электромобилларидан, бу йил биринчи чорагида етказиб берилган электромобиллар сони 68 фоизга ўсган.
Ўтган ой Tesla ўзининг Шанхайдаги заводини Covid-19 вируси кўпайиб кетганидан кейин икки кунга ёпган эди. Ўтган ҳафта эса бутун Шанхай шаҳрининг локдаунга тушиши сабабли компания яна заводни ёпишга мажбур бўлган. Шанхай заводи компаниянинг энг йирик заводи бўлиб, у ерда Model 3 ва Model Y моделларини ишлаб чиқарилар эди.
Tesla яқинда Германиянинг Берлин шаҳрида ўзининг Европадаги биринчи заводини очди ва 7 апрел куни эса Техасдаги гигафабрикасининг тантанали очилиш маросимини ўтказади. Булар компанияга Шанхай заводи ишлаб чиқариш муаммоларини бартараф этишга ёрдам беради.
