Ультра товушли бармоқ изи сканери қандай ишлайди?

Ультра товушли бармоқ изи сканери қандай ишлайди?

Бир неча кун олдин энг кўп тарқалган оптик бармоқ изи сканери ҳақида сўз юритган эдик. Бу сафар эса ультра товушли бармоқ изи сканери билан танишамиз. 

Смартфон индустриясига энг сўнгги бўлиб кириб келган бармоқ изини сканерлаш технологияси бу - ультратовуш сенсор ҳисобланади. У биринчи марта 2016 йилда Le Max Pro смартфонига ўрнатилган. 

Ушбу сканер кўп жиҳатдан Qualcomm ва Sense ID технологияси билан боғлиқ. 

Ҳозирда Qualcomm ультра товушли бармоқ изи сканерини иккинчи авлодини ишлаб чиқармоқда. Янги авлод каттароқ бармоқ изини олиш майдони ва юқори тезликни тақдим этади. 

Бармоқ изи тафсилотларини аниқлаш учун сенсор ультратовуш узатувчи ва уни қабул қилувчи аппаратларидан фойдаланади. 

Ультрасоник импульс сканер устига қўйилган бармоққа қараб йўналтирилади. Импульснинг бир қисми эса ҳар бир бармоқ изига хос бўлган шакл, из ва бошқа тафсилотларга қараб сенсорга қайтарилади. 

Қайтган сигнал микрофон орқали қабул қилинмайди. Бунинг ўрнига, сканернинг турли нуқталарида қайтган ультра товушли пульсларни ҳисоблашда фойдаланадиган механик кучланишни ўлчовчи сенсордан фойдаланилади. 

Узоқ вақт давомида сканерлаш қўшимча чуқурлик маълумотларини олиш имконини беради. Бу орқали сканерланган бармоқ изининг 3D репродукциясини яратиш мумкин. Ушбу тизим қолган бармоқ изи сканерларига қараганда анча хавфсизроқ. 

Qualcomm'нинг 3D экран ости бармоқ изи сканери Galaxy S10, Note 10 ва Note 20 серияларига ўрнатилган эди. Унинг иккинчи авлодини Galaxy S21 сериясида учратиш мумкин. 

Samsung'нинг таъкидлашича, янги авлод эскисига қараганда 50% га тезроқ ишлайди ҳамда 77% каттароқ намуна олиш майдонига эга. 

Ультра товушли сканернинг камчилиги шундаки, у бошқа сканерлар каби тез ишламайди. Бу қисман юқорида айтиб ўтилган сабабларга боғлиқ. Бироқ Qualcomm буни иккинчи авлод технологияси билан ҳал қилди. 

Агар экранга ҳимоя шишаси қўйилса, сканернинг ишлаши янада секинлашади. Шиша қалинроқ бўлса, умуман ишламаслиги мумкин. Ушбу сканер экран остида бўлганлиги учун смартфон рамкаларини янада қисқартириш имконияти пайдо бўлади.

ЎҚИНГ: Оптик бармоқ изи сканери қандай ишлайди?