Халқаро Мобил Конгресс 2022 тадбирда қандай смартфонлар тақдим этилди?

Hasanboy
1155
07.03.2022 13:53

Халқаро Мобил Конгресс (MWC) 2022 тадбирида бир қанча янги смартфонлар тақдим этилди. Биз эса ушбу конференцияда тақдим этилган смартфонлар ҳақида сўз юритамиз.

TCL

Даставвал TCL смартфонларидан бошлаймиз. TCL компанияси TCL сериясига кирувчи бешта янги смартфонни тақдим этди. TCL 30 5Г модели Dimensity 700 чипи, 6.7 дюймли AMOLED дисплейи, 50МП асосий камера ҳамда 18 ваттда қувват олувчи 5,010 мАс сиғимли аккумулятор билан жиҳозланган. Смартфон апрель ойида сотувга чиқади. Унинг нархи 250 еврони ташкил қилади.

Кейинги модель TCL 30+ бўлиб, унинг нархи 200 евродан бошланади. Ушбу моделга ҳам 6.7 дюймли AMOLED дисплейи ҳамда 18 ваттда қувват олувчи 5,010 мАс сиғимли аккумулятор ўрнатилган. Бироқ у нисбатан кучсизроқ Helio G37 чипига эга.

Кейинги смартфон TCL 30 модели бўлиб, унинг нархи ва техник кўрсаткичлари деярли TCL 30+ қурилмаси билан бир хил.

Сериядаги сўнгги қурилмалар TCL 30 SE ва 30 E. 30 SE моделига 6.52 дюймли LCD дисплейи, Helio G25 чипи ҳамда 50МП асосий камера ва унга қўшимча иккита камера ўрнатилган. Унинг нархи 150 еврони ташкил қилади.

TCL 30 E ҳам Helio G25 чипи билан жиҳозланган. Бироқ унинг 3/64ГБ хотирага эга бўлган тури бўлафи ҳолос. Ушбу модель 140 евро нархда сотувга чиқади.

Nokia

Nokia компанияси конференция давомида учта янги смартфонни эълон қилди. Уларнинг энг каттаси C21 Plus модели бўлиб, у HD+ резолюциядаги 6.5 дюймли LCD дисплейи, Unisoc SC9863A чипи ва 4,000 мАс сиғимли аккумулятор эга.

Nokia C21 моделига ҳам C21 Plus эга бўлган дисплей ўрнатилган. Бироқ унинг максимал хотира ҳажми 3/64ГБ ни ташкил этади ҳамда кичикроқ 3,000 мАс аккумулятор ва битта 8МП асосий камерага эга. Икки смартфон Android 11 Go Edition тизимида ишлайди. Уларнинг нархи ҳақида ҳеч қандай маълумот берилмади.

Nokia X2 модели эса энг арзон смартфонлар сирасига киради. У 480х960 пиксел резолюциядаги 5.7 дюймли LCD дисплейи, 5МП камера ҳамда 2,400 мАс сиғимли аккумуляторга эга.

realme

realme компанияси GT2 ва GT2 Pro моделларининг глобал версиясини ушбу тадбирда тақдим этди. Уларнинг нархи мос равишда 449 ва 649 еврони ташкил этади.

Xiaomi Poco

Xiaomi суббренди ҳисобланувчи Poco тадбир доирасида Poco X4 Pro 5G ва Poco M4 Pro моделларини тақдим этди. Иккала қурилма ҳам AMOLED дисплейи билан жиҳозланган. X4 Pro смартфони 120Hz янгиланиш частотасини, M4 Pro эса 90Hz янгиланиш частотасини қўллаб-қувватлайди.

X4 Pro 5Г моделининг нархи 300 евродан бошланади. Унга Snapdragon 695 чипи, 108МП асосий камера, 67 ваттда қувват олувчи 5,000 мАс сиғимли аккумулятор ўрнатилган.

M4 Pro моделининг нархи эса 220 евродан бошланади. Қурилма Helio G96 чипи, 50МП асосий камера ва 33 ваттда қувват олувчи 5,000 мАс аккумулятор билан жиҳозланган.

Honor

Honor ўзининг икки янги флагманини эълон қилди. Magic 4 ва Magic 4 Pro моделлари Snapdragon 8 Gen1 чипи, 6.8 дюймли OLED дисплейи (Pro моделда LTPO 2.0) 50МП асосий ва ультракенг камераларга эга.

Оддий моделга қараган Pro модель бир қанча устунликларга эга. Хусусан, у 3.5х оптик ҳамда 100х рақамли зумни қўллаб-қувватловчи 64МП телефото камера ҳамда 100 ватт қувватлаш технологиясибилан жиҳозланган бўлса, оддий моделга 66 ватт қувватлаш технологияси ва 8МП телефото камера ўрнатилган.

Honor Magic 4 моделининг нархи 899 евро, Pro моделники эса 1099 евродан бошланади.

ZTE

ZTE компанияси Blade V40 ва V40 Pro, V40 5G ва V40 Vita моделларини тақдим этди. V40 Pro модели 6.67 дюймли AMOLED дисплейи, Unisoc Т618 чипи, 64МП асосий камера, 65 ваттда қувват олувчи 5,100 мАс сиғимли аккумуляторга эга. V40 модели эса 48МП асосий камера ва 22.5 ватт қувватлаш технологиясига эга. Қолган кўрсаткичлар Pro моделники билан бир хил.

Blade V40 5G модели Dimensity 700 чипи, 6.67 дюймли LCD дисплейи ва 22.5 ваттда қувват олувчи 6,000 мАс сиғимли аккумуляторга эга бўлса, V40 Vita моделига эса 90Hz частотада ишловчи 6.75 дюймли дисплей, Unisoc чипи ҳамда 22.5 ваттда қувват олувчи 6,000 мАс аккумулятор ўрнатилган

vivo

vivo компанияси Dimensity 700 чипи, 6.51 дюймли LCD дисплей ҳамда 18 ваттда қувват олувчи 5,000 мАс сиғимли аккумулятор эга бўлган Y33s смартфонини тақдим этди. Унинг нархи 205 долларни ташкил қилади.

Lenovo

Lenovo компанияси Legion Y90 ўйинбоп смартфонни эълон қилди. Қурилма 144Hz частотада ишловчи 6.92 дюймли AMOLED дисплейи, Snapdragon 8 Gen1 чипи, 68 ваттда қувват олувчи 5,600 мАс сиғимли аккумуляторга эга. Унинг нархи 680 доллардан бошланади.

Motorola

Motorola компанияси 90Hz частотада ишловчи 6.5 дюймли LCD дисплей, 50МП асосий камера ва 5,000 мАс сиғимли аккумулятор эга бўлган 170 евролик Moto G22 моделини тақдим этди.

Samsung

Кореялик техногигант Galaxy A13 4G, A23 4G, M23 ва M33 бюджет синфига кирувчи смартфонларни тақдим этди. A13 ва A23 моделлари бир-бирига ўхшайди. Мисол учун, уларга 6.6 дюймли LCD дисплей, 50МП асосий камера ва 25 ваттда қувват олувчи 5,000 мАс сиғимли аккумулятор ўрнатилган.

M23 ҳамда M33 моделлари эса 6.6 дюймли LCD дисплей ва 50МП асосий камерага эга. Икки қурилмани аккумулятори ҳажми ажратиб туради, яъни M23 модели 5,000 мАс аккумулятор билан, M33 эса 6,000 мАс аккумулятор билан жиҳозланган.