Xiaomi бу сафар ҳам янги инновация билан ҳаммани лол қолдирди
Сўнгги вақтларда шиша корпусли смартфонлардан фойдаланиш урфга айланди. Бироқ ҳар қандай гўзаллик қурбонлик талаб қилади - бундай корпусларда қолдирилган бармоқ изи аниқ кўриниб туради ва улар жуда тез хира тортади. Ўзининг техника оламидаги турли янгиликлари билан ҳаммани ҳайратда қолдирувчи Xiaomi компанияси бу сафар ҳам отни қамчилашга қарор қилди: шиша корпуслар билан дуч келинадиган бундай муаммони бартараф этишга мўлжалланган «инновацион» салфеткаларни тақдим қилди.
Xiaomi салфеткаларнинг 15 тасини 78 сентдан сотишга қарор қилди. Компаниянинг маълум қилишича, бундай салфеткалар билан нафақат телефон экрани ва корпуси, балки кўзойнаклар, мониторлар ва ноутбуклар дисплейидаги доғларни ҳам осонлик билан йўқотиш мумкин экан. Салфеткалар жуда тез қурийди, қотиб қолмайди ва уларнинг ҳар икки томонини ишлатиш мумкин. Бир салфетканинг ўлчами 12,5 х 10 сантиметрга тенг.
ЎҚИНГ: Кун янгилиги: Xiaomi'дан янги «ақлли» кроссовка
Бу салфеткалар антибактериал хусусиятга эга бўлиб, одатий салфеткалардан анчайин юмшоқдир. Xiaomi'нинг ушбу янгилиги хуш қабул қилинган бўлсада, аксарият одамлар шунча салфетка танлови турганда компаниянинг бу маҳсулотига талаб қай даражада юқори бўлиши билан қизиқмоқда. Маълум бўлишича, Xiaomi бундан буёқ сотиладиган смартфонлари қутиси ичига ушбу салфеткаларни ҳам жойлаштиради. Тўғрида, Apple маҳсулотлари қутисига олмали наклейкаларни солаётган бир пайтда Xiaomi бир жуфт салфеткадан қизғансинми.
