$1,5 млрд.лик бизнес эгаси нега смартфон ишлатмаслигини маълум қилди
Шелдон Йеллен 31 мамлакатда қиймати $1.5 миллиард долларга тенг бизнесига эга. У кўчмас мулк таъмири билан шуғулланувчи Belfor компаниясининг раҳбари. Унинг қўл остида ишлайдиган деярли барчада смартфон бор. Аммо унинг ўзи ҳали ҳам соддагина — смс ёзиш ва қўнғироқни амалга оширишга қодир мобиль алоқа воситасидан фойдаланади.
“Бугунги замонавий смартфонларда самимийлик ва чинакам ҳис-туйғуни, ғамхўрликни ифодалаб бўлмайди. Содда телефон эса одамни чалғитмайди. Унда хотиржам суҳбат қуриш мумкин”, дейди жаноб Шелдон CNBC телеканалига берган интервьюсида.
“Мени яхши билган кимдир менга нимадир дейиши керак бўлса, олдимга смартфонсиз киради. Мен мендан нари борса 10 метр уёқдаги одам билан смс-хабар ёзишиш ўрнига жонли суҳбат қилишни маъқул кўраман”.
“Мен смартфонларни ёқтирмайман ва сизга сабабини ҳам айтаман. Мижозларимдан бири 3 ой кутиб, мен билан ўтган 10 дақиқа суҳбат асносида 3 маротаба смартфонига қараб, ким биландир хабар ёзишди. Табиийки, бу менга нисбатан ҳурматсизлик эди. Шу сабабли, мен билан ҳамкорликни қўлдан бой берди. Ўйлайманки, бу унинг учун энг яхши сабоқ бўлади”.
“Мен одамларнинг менга гапиришларини, менинг сўзларимни чиндан тинглашларини истайман, холос”.
Belfor компаниясида учрашувлар чоғида смартфондан фойдаланиш тақиқланади. Бу ёзилмаган қонун каби — унга ҳамма бўйсунади.
