12 ГБ «оперативка»ли Realme X3 тақдимот арафасида GeekBench’да кучини кўрсатди
Oppo корпорациясининг арзончи суббренди 25 июнь куни ўзининг Realme X3 смартфонини намойиш қилади. Айтиш керакки, у Android 11’гача биринчи тўлқиндаёқ янгиланувчи 129 та смартфон рўйхатига ҳам кирган.
ЎҚИНГ: ЭҲТИЁТ БЎЛИНГ: Android 11 Beta’ни ушбу смартфонларга ўрнатиш хавфли!
RealMe бренди бу смартфонини расман намойиш этишдан аввал GeekBench сервисида текшириб кўрди. Имтиҳон қилиб кўрилган Realme X3 ҳозирги флагмандан битта олдинги – Snapdragon 855+ процессори ва нақ 12 гигабайтлик тезкор хотира билан қуролланган.
Бенчмарк маълумотларига кўра, Realme X3 якка ядроли синовда 2307 балл, чипсетнинг барча ядроларини ишлатиб текширганда эса 8216 балл олган.
Шу билан бирга, Realme X3 смартфони аввал ҳам турли регуляторларда рўйхатга олинган ва унинг асосий хусусиятлари маълум. Яъни, мазкур қурилма диагоналига 6,6 дюймлик IPS-экранга эга. Дисплейнинг тасвир аниқлиги Full HD+ форматида бўлиб, у янги трендга мос тарзда 120 герцлик частотада кадр янгиланишини қўллаб-қувватлайди. Гаджет корпусининг ҳам олд, ҳам орқа тарафи Gorilla Glass 5 ҳимоя шишаси билан муҳофаза этилган.
Realme X3 модели харидорларга 6, 8 ва 12 гигабайтлик тезкор ҳамда 64, 128 ва 256 ГБ гигабайтлик доимий хотирага эга вариантларда таклиф этилади.
Қурилма экранидаги овал туйнукда қўшалоқ селфи-камеранинг 16 + 8 мегапикселлик модуллари жойлашган. Смартфоннинг бош камераси эса 64 + 8 + 12 + 2 мегапикселлик сенсорларни ўз ичига олган. Ундаги телеобъектив 2 карралик оптик зумни таъминлайди.
ЎҚИНГ: Ўрта нархли смартфонлар ТОП-ўнталиги (AnTuTu рейтинги, 2020 йил май)