15 март: Apple янги талқиндаги гаджетларига нима ўзгартириш киритмоқчи?
Калифорниялик рақамли қурилмалар ишлаб чиқарувчи гигантнинг “Дунёнинг энг қимматли компанияси” номини сақлаб қолишга бўлган ҳаракати бу йил ҳам ўзини янгидан-янги мўъжизакор технологиялар билан оқлаши кутилмоқда.
9to5Mac технологиялар блогининг тарқатган хабарларига кўра, Apple’нинг навбатдаги тақдимотида iPhone 5se, Apple Watch “ақлли соати”, iPad Air планшетининг янги талқини намойиш қилинади. Ҳозирча ушбу тақдимотнинг 15 мартда бўлиб ўтиши кутилмоқда. Аммо бу маълумот компания томонидан тасдиқлангани йўқ.
Блогда ёзилишича, 4 дюймли iPhone 5se кўриниши жиҳатидан, яъни корпуси iPhone 5s’га ўхшайди ва унинг нархи ҳам ўзининг “аждоди”ники каби, 450 АҚШ долларидан сотувга чиқарилади. Фарқли томони шундаки, мазкур янги мобиль алоқа воситаси Apple’нинг сўнгги инновациялари, яъни A9 процессори ҳамда Apple Pay электрон тўлов тизимига эга бўлади. Бу дегани – iPhone 5se янада тезкор ишлайди.
Technalysis Research тадқиқот нашрининг бош таҳлилчиси Боб О’доннел эса, ушбу қурилманинг олдингисига нисбатан кичикроқ ҳажмда бўлишини тахмин қилмоқда. “Смартфон дегани катта экран билан ажралиб турмайди. Кичик ва ихчам экранли қурилмаларнинг ишқибозлари ҳам кўп. Шу сабабли, 4 дюйм, гарчи технология оламига ўзгариш олиб келмаса ҳам, манимча кўпчиликка маъқул бўлади,” дейди у.
Мазкур смартфон ҳам дисплей қаламчасига эга бўлиши мумкин.
Шунингдек, у билан бирга тақдим қилиниши кутилаётган Apple Watch ва iPad Air қурилмалари ҳам янги талқин ва ўзгаришлар билан бойитилган. Хусусан, “ақлли соат” “S” русумидаги тақиладиган қурилмалар қаторидан жой олади. Унинг таркибий қисми ўзгариб, аккумуляторнинг қувват ҳажми оширилади, шу билан бирга боғичида билакка қулай ўрнашуви билан боғлиқ ўзгаришлар бўлиши, унда Milanese Loop Space Black браслети бўлиши мумкин.
2013 йилнинг октябрь ойида намойиши бўлиб ўтган iPad Air планшетининг янги – учинчи талқини корпус ва кўринишидан 2014 йилда эълон қилинган iPad Air 2 планшетини эслатса, унинг ички имконият ва функциялари 2015 йилнинг 9 сентябрида мухлислар эътиборига ҳавола қилинган iPad Pro’ники билан бир хил бўлиши хабар қилинмоқда.
9.7 дюймли экран пиксель сиғими 2334 x 3112, 4K технологияга асосланган, 3D Touch технологияси билан таъминланган бўлади.
iPad Air 3 қурилмасининг камерасида диодли фоточақноқ мавжуд бўлади. Ундаги тўрт дона овоз узаткичлар ҳам сўнгги стерео овоз технологияси билан бойитилади. Smart Connector портали орқали энди планшетни клавиатурага ҳам улаш мумкин.
Worldpanel ComTech блогининг ёзишича, iPad Pro гаджети планшет саноатига ўзига хос бирор жиҳат билан кириб келган эмас ва компания навбатдаги қурилмада инновацион технологияни татбиқ қилиши мумкин.
Ҳозирча нарх-наво борасида бирор фикр айтиш қийин. Amazon интернет дўконида компаниянинг сўнгги планшети – Apple iPad Pro 720.99 АҚШ долларидан сотилмоқда. “Малика” савдо мажмуасида эса iPad Air 2 (Wi-Fi, 4G, 64 Гб.) қурилмаси 4.150.000 сўмга баҳоланган.
