15 миллионта банк картасини ўғирлаган шоввозлар: украиналик хакерлар гуруҳи қўлга тушди

Уч нафар Украина фуқароси хакерлиги учун ҳибсга олинди. Улар 100 та компанияга хакерлик ҳужумини уюштирган. Компаниялар орасида йрик ресторанлар тармоқлари ҳам бўлган.  Асосан, банк карталари жиноятчилар нишонига айланган. Фирибгарлар жами 15 миллионта мижозни ўз ўлжасига айлантиришган экан.

Интернет-хавфсизлик бўйича мутахассислар аниқлашича, ушбу хакерлар  Carbanak гуруҳи таркибига киради. Улар ўғирликни содир этишда касса аппаратлари билан ишлайдиган компьютерларни бузиш учун фишинг ва ижтимоий муҳандисликдан фойдаланишган. Биринчи босқичда вирус турли компанияларнинг савдо нуқталаридаги компьютерига электрон почта орқали юборилган. Фирибгарлар АҚШнинг қимматбаҳо  қоғозлари ва биржалари бўйича Комиссияси ҳамда турли меҳмонхоналарнинг хатини ниқоб қилиб иш кўришган.

ЎҚИНГ:Хакерлар Автомобилларга ёқилғи қуйиш шохобчаси (АЁҚШ)да тўлов тизимини издан чиқарди

Баъзи ҳолатларда улар FDA озиқ-овқат хавфсизлиги Маркази хабарлари остида  зарарли хатлардан ҳам фойдаланишган. Хат матни тахминан шундай бўлган: «Ушбу ҳужжатда сизнинг ресторанингизда ўтказилиши режалаштирилаётган текширувларнинг  тўлиқ рўйхати билан танишишингиз мумкин бўлади».

Ҳибсга олинган жиноятчиларнинг исми-шарифи ҳам маълум — Дмитрий Федоров, Федор Хладыра ва Андрей Колпаков. Улар жиноий тил бириктирганлик, фирибгарлик, компьютерларни бузиб кириш ва шахсий маълумотларни атай ўғирлаш каби айбловлар билан сўроқ қилинмоқда. Дарвоқе, жиноятчиларнинг ҳар бирини алоҳида алоҳида, яна турли мамлакатларда қўлга туширишган. Бири Германияда, иккинчиси Польшада ва учинчиси Испанияда яшириниб юрган экан.

ЎҚИНГ:Android фойдаланувчилари эҳтиёт бўлинг, пулингизни ўғирлашади!