150 ваттда қувват олувчи Snapdragon 8+ Gen1 чипли смартфон тақдим этилди

150 ваттда қувват олувчи Snapdragon 8+ Gen1 чипли смартфон тақдим этилди

OnePlus компанияси ўзининг энг кучли смартфони - OnePlus 10T'ни тақдим этди. Компания бу йил стратегияни бироз ўзгартирди, яъни 10T модели йилнинг иккинчи ярмида тақдим этилди. 

Смартфон нархини пасайтириш мақсадида ундан бир неча имкониятлар олиб ташланган бўлса-да, баъзи техник кўрсаткичлари бўйича 10T модели 10 Pro моделидан устун туради. 

Қурилмага HDR10+ стандарти ва 120 гертс частотани қўллаб-қувватловчи 1080 х 2412 резолюциядаги 6.7 дюймли OLED дисплейи ўрнатилган. Аммо бу дисплей OnePlus 10 Pro моделиники каби LTPO2 панели эмас. 

Янги моделнинг устун томони бу унинг чипсетида. Қурилма янги Snapdragon 8+ Gen1 чипи билан жиҳозланган. Чип 8/16ГБ тезкор ҳамда 128/256ГБ доимий хотира билан бирлаштирилган. Компания 3D совутиш тизимига урғу бермоқда, бу OnePlus смартфонларига ўрнатилган энг катта совутиш тизими ҳисобланади. 

Смартфоннинг нархини тушириш учун асосан камера техник кўрсаткичлари пасайтирилган. Хусусан, юқори резолюцияли ультракенг ва 3х оптик зумга эга бўлган телефото камералар 12МП оддий ультракенг ва макро камералари билан алмаштирилган. Яхшиямки, 10 Pro моделидаги IMX766 сенсорли асосий камера сақлаб қолинган. Ушбу сенсор f/1.8 диафрагма ва оптик стабилизацияли линзаларга эга. Олд панелда эса 16МП (1.0µm ва f/2.4 диафрагма) селфи камера жойлашган.

Смартфон 150 ваттда қувват олувчи 4,800 мАс сиғимли аккумулятор билан жиҳозланган. Унинг қутисида 160 ваттлик қувватлаш адаптери бўлади. 110 вольт энергия таъминотидаги мамлакатларга 125 ваттда қувват олувчи смартфонлар етказиб берилади. 

OnePlus, шунингдек, аккумуляторнинг узоқ муддат ҳизмат кўрсатишига ёрдам берувчи тизимни ишлаб чиқди. Аккумулятор 1600 марта зарядлаш циклидан сўнг ўз қувватининг тахминан 80 фоизини сақлаб қолишига компания ваъда беради.

Қурилма Moonstone Black ва Jade Green рангларда тақдим этилди. Европада смартфонга олдиндан буюртма бериш кечадан бошланди. Етказиб бериш жараёнлари эса 25 августдан бошланади.

Смартфоннинг Европадаги нархи қуйидагича:

8/128ГБ - 699 евро

12/256ГБ - 799 евро

АҚШдаги нархи эса қуйидагича:

8/128ГБ - 649 доллар

12/256ГБ - 749 доллар

ЎҚИНГ: Galaxy S23 Ultra янги 200МП камера сенсори билан жиҳозланади 

Сайтимизнинг энг чиройли расмларини Инстаграмдаги саҳифамизда томоша қилинг!