2 март – компакт-дискнинг «туғилган куни»
Инсоният товушни ёзиб олиш ва уни ижро эттиришга мосланган ускуналар яратишга ҳаракат қилиб, техника тараққиётининг турли босқичларида турфа мосламалар ясаган. Бу масалани Томас Эдисон нисбатан яхши уддалаган – фонограф ихтиро қилган. Кейинги даврларда технология янада ривожланди, компьютерлар ихтиро қилинди ва нафақат овоз ва тасвирларни, балки ҳар қандай ахборотни ҳам сақлайдиган сақлагичларга эҳтиёж туғилди.
Ниҳоят, бу борада катта янгилик яратилди – Буюк Британияда 1983 йилнинг 2 март санасида Philips, Sony ва Polygram компаниялари томонидан компакт-диск (оптик диск) намойиш этилди. Ўша давр учун бу улкан сенсация эди.
Тақдим этилган компакт-диск диаметри 12 сантиметрга тенг эди. Намойиш этиш учун унга Бетховеннинг Тўққизинчи симфонияси ёзилган эди. Лазерли ускуна ёрдамида ёзилган аудиоёзув давомийлиги 74 дақиқа эди – симфония ижроси айнан шунча вақт давом этарди. Шунча муддатлик ёзув сиғими кейинчалик дисклар учун стандарт бўлиб қолди.
Оптик дисклар дастлаб аудио ёзишга мўлжалланган бўлса, кейинчалик бошқа форматдаги файллар ҳам ёзиладиган бўлди. CD-ROM ихтиро қилинди, сўнгроқ яратилган CD-R ва CD-RW’ларда эса ҳар қандай рақамли ахборотни сақлаш имкони мавжуд эди. CD-R дискларга бир мартагина ёзиш имкони бўлса, CD-RW дискларига тегишли дисковод ёрдамида бир неча марталаб файл ёзиш ва ўчириш мумкин бўлди. DVD-дисклар эса бу борадаги навбатдаги қадам бўлди.
21-асрга келиб эса, флэш-технологияларнинг ривожланиши туфайли, Audio-CD дисклар аста-секинлик билан истеъмолдан чиқиб бормоқда.
