200MP камерали смартфонлар даври яқинлашмоқда
Хитойдаги Motorola компанияси 200MP камера сенсорига эга дунёдаги энг биринчи смартфонни қачон тақдим қилишини расман тасдиқлади. Гарчи аниқ сана кўрсатилмаган бўлса-да, Weibo ижтимоий тармоғига жойланган расмий тизер постерга "200 миллион пикселли тасвир даври" июл ойида бошланиши ёзилган.
Катта эҳтимол билан рекорд даражадаги камера сенсорига эга янги Motorola флагмани - бу анчадан бери миш-миш қилинаётган Frontier бўлиши мумкин. Маълумотларга кўра, Motorola Frontier телефони Samsung томонидан ишлаб чиқариладиган 200MP ISOCELL HP1 сенсори билан таъминланади. Сенсор пикселларни бирлаштириш ва сунъий интеллектга асосланган қайта мозайкалаш алгоритми билан 12.5MP ёки 50MP кадрларни ишлаб чиқара олади. Шунингдек, у 30fps'да 8К видео ёзиб олишни ҳам қўллаб-қувватлайди.
Таъкидлаш жоизки, Motorola бир неча кун олдин тақдим қилинган Snapdragon 8+ Gen 1 чипсети билан ҳам смартфон ишлаб чиқаришини маълум қилган эди ва у 200MP сенсор билан чиқариладиган бир хил смартфон бўлиши мумкин.
Motorola Frontier четлари бироз қайрилган 6.67 дюймли ва 144Hz янгиланиш тезлигига эга pOLED дисплей билан 60MP селфи камерага эга бўлиши таҳмин қилинмоқда. Капот остида эса 8/12GB оператив ва 128/256GB доимий хотира билан 125W тезликда қувватланадиган 4,500 mAh батарея сиғимига эга бўлиши мумкин.
