2017 йилнинг қайси смартфони амалда энг тезкор? (+видео)
Жорий йилда смартфонлар бозори янгиликларга бой бўлди. Янги қурилмалар дизайни, имкониятлари ва, муҳим жиҳатларидан бири – тезкорлиги борасида ҳам бир-биридан ўзишга интилишди.
Смартфонларнинг хусусиятларини турли сайтлардан ўқиб билишимиз, синтетик тестлар натижаларини солиштиришимиз мумкин, аммо ишлаш самарадорлиги – тезлигини фақат амалда синаб ва солиштириб кўра оламиз. AndroidPit ресурси айнан шу ишни амалга ошириб, синов натижаларини ва видеосини эълон қилган.
Синовда Huawei P10 Plus, Sony Xperia XZ Premium, Samsung Galaxy S8+, HTC U11, LG G6 ҳамда охирги Android O бета талқинидаги Google Pixel смартфонлари иштирок этишди. Умуман олганда, рақобатчи қурилмаларни яхши танлаб олишган: булар бугунги кунда бозордаги флагманлар орасида энг яхшилари ҳисобланади.
Тезлик синови секундомер ҳамда қурилмадаги танланган иловаларни ишга тушириб текширадиган DiscoMark бенчмарк дастури ёрдамида амалга оширилди. Текширув учун энг оммабоп иловалар: Google Calendar, Камера, Chrome, Facebook, Gmail, Instagram, Google Maps, Facebook Messenger, Google Фото, Spotify, Twitter ҳамда YouTube танланди.
Тест бошланишидан аввал смартфонларнинг барчаси завод созламаларига қайтарилиб, сўнг барча керакли янгиланишлар ўрнатилди. Уларнинг ҳар бири қувватлаш қурилмасига уланиб, синов бошланишидан олдин ўчириб-ёқилди.
Шундан кейинги тест жараёнини қуйидаги видеолавҳада кузатишингиз мумкин:
Кўриб турганингиздек, тезлик борасида учта смартфон биринчи ўринни эгаллади. Уларнинг натижалари орасидаги фарқ бир сонияга ҳам етмайди. Энг тезкор қурилмалар – HTC U11, Huawei P10 Plus ҳамда сўнгги Android O бета талқинидаги Google Pixel бўлди. Шу тариқа, HTC U11 ўзининг энг бақувват смартфон эканлигини яна бир бор исботлади.
Бу учовлондан тўрт сония кейинги кўрсаткич билан Galaxy S8+ ва Sony Xperia XZ Premium ҳам вазифаларни якунлаб улгуришди. Яна беш сониядан сўнг маррага LG G6 етиб келди, уни етакчилардан тахминан 9 сония вақт ажратиб турибди. Афтидан, бунинг сабаби – унга эскироқ Snapdragon 821 процессори ўрнатилганлигидир. Тўғри, Google Pixel ҳам шу процессор асосида яратилган, бироқ у анчагина оптималлаштирилган дастурий таъминотда ишлайди.
Ғолиблик шоҳсупасидаги иккита смартфонга Snapdragon 835 ўрнатилган, лекин HiSilicon Kirin 960 процессори билан Huawei P10 Plus ҳам улардан қолишгани йўқ. Яна бир жиҳатини таъкидлаш ўринли – Huawei девайсининг тезкор хотираси барча рақобатчилариникига нисбатан 2 гигабайтга катта.
Эслатиб ўтамиз, тезкорлик синови қатнашчилари ҳақидаги турли маълумотларни сайтимизда бериб келмоқдамиз. Жумладан, етакчилардан «Малика» савдо марказида ҳам сотилаётган Huawei P10 Plus тавсифини мана бу мақоламизда ўқишингиз мумкин. HTC U11’нинг ҳам илғор жиҳатлари кўп, масалан унинг сенсор ромли – Edge Sense технологиясидаги корпусини таъкидлаш мумкин. Google Pixel ва бошқа айрим моделларга ўрнатилган «Android O» номли янги мобил операцион тизимидаги илғор жиҳатлар хусусида эса бу ерда сўз юритилган. Шунингдек, тест иштирокчиларининг аксарияти 2017 йилнинг энг яхши сотилаётган смартфонлари қаторига киритилган бўлиб, уларнинг жиҳат ва нархлари билан тегишли мақоламиз орқали танишиб чиқиш имкони мавжуд.
