2017 йилнинг харидоргир девайслари рейтинги эълон қилинди
Халқаро GBH маркетинг тадқиқотлари компанияси томонидан эълон қилинган ҳисоботга кўра, Apple смартфонларининг умумий савдо кўлами 2017 йилда бошқа технологик қурилмаларга қараганда кескин кўтарилиб кетган. Компания дунё бўйлаб энг яхши сотилаётган технологик гаджетларни ишлаб чиқармоқда.
Экспертларнинг ҳисоб-китобларига кўра, Apple 2017 йилда жаҳон миқёсида жами ўртача 233 миллион дона iPhone сотишга эришган. Бошқа бирор бир электрон қурилма дунёда бунчалик кўп сотилгани йўқ. Иккинчи ўрин эса кутилганидек, Samsung Galaxy S8 ҳамда Samsung Galaxy Note 8 моделлари ҳиссасига тўғри келмоқда. Маълумотларга кўра, кореялик ишлаб чиқарувчи бу девайслардан йил давомида 33 миллион дона сотган.
Энг яхши сотиладиган гаджетларнинг етакчи учлигини Amazon компаниясининг Echo Dot смарт-динамикаси якунлаб берган. 2017 йилда бу колонокадан жами 24 миллион дона сотилган. Олдинги йилда жаҳоннинг энг оммабоп гаджетлари рўйхатида тўртинчи ўрин Apple Watch қурилмасига насиб қилган. Компания 20 миллион дона бундай "ақлли соат"дан сотишга муваффақ бўлган. Бешинчи ўринда эса Nintendo Switch гибрид консоли турибди. Геймерлар дунё бўйича 15 миллион дона шундай қурилмани сотиб олишган.
iPhone қурилмаси 2016 йилда ҳам жаҳоннинг энг яхши сотилган девайси номини қўлга киритган эди. Ўша йили Apple 211 миллион дона смартфон сотишга эришган эди. Таҳлилчиларнинг ҳисоблашларича, 2018 йилда ҳам компания бу номни ўзида сақлаб қолади. Модомики, бу йил кутиганидек, Apple гаджетлари арзонлашса, корпорацияни чинакам омад кутиб турибди.
Шу билан бирга, "ақлли колонка" сотишда Apple рақиби Amazon'ни ҳам ортда қолдириб, Home Pod қурилмасидан энг кўп сотиши ҳам мумкин.
