2019 йилнинг сўнгги флагмани аллақачон рекорд ўрнатди – бу Xiaomi ёки Samsung эмас!
MediaTek компаниясининг Dimensity 1000 процессори базасидаги илк 5G-смартфон Reno 3 бўлгани ҳақида хабар бергандик. У билан бирга, 26 декабрь куни Oppo яна Reno 3 Pro флагманини ҳам намойиш қилган.
ЎҚИНГ: 5G тармоғи бизга қандай муаммолар олиб келади?
Oppo Reno 3 Pro смартфони янада кучли – Qualcomm компаниясининг 7 нанометрлик Snapdragon 765G процессори базасига қурилган. Бундан ташқари, у дизайни билан ҳам стандарт версиядан жиддий фарқланади. Oppo Reno 3 моделида томчисимон кемтикли экран қўлланган бўлса, Reno 3 Pro қурилмаси 32 мегапикселлик селфи-камера учун тирқишли дисплейга эга.
Ушбу флагманнинг 4025 мА/соатлик аккумуляторида ҳам Oppo’нинг тезкор технологияси – VOOC 4.0 қўлланган. Reno 3 Pro тезкор ва доимий хотира ҳажмига кўра икки хил конфигурацияда – 8/128 гигабайтлиги 570 доллардан, 12/256 гигабайтлиги эса 645 доллардан таклиф этиляпти.
Нархи ўртача бўлса-да, Reno 3 Pro диагоналига 6,5 дюймлик AMOLED-экран билан таъминланган. Четлари қайрилма дисплейнинг тасвир аниқлиги 2400х1080 пикселлик, кадрнинг янгиланиш частотаси эса 90 герцга тенг. Бармоқ изи сканери ҳам экраннинг ўзига жойланган.
ЎҚИНГ: Янги йилда янги тезлик!
Oppo Reno 3 Pro бош камераси тўртталик бўлиб, асосий модул сифатида 48 мегапикселлик Sony IMX586 датчиги ва F/1,7 диафрагмали объектив қўлланган. 13 мегапикселлик иккинчи сенсор эса 5 карралик гибрид зумни таъминловчи телеобъектив билан таъминланган. Қолган иккита тасвир датчиклари 8 ва 2 мегапикселлик аниқликда бўлиб, тегишлича кенг форматли (кўриш бурчаги 115 даражали) суратга олиш ҳамда макросъёмка (фокуслаш масофаси 2,5 см) учун қўлланади. Reno 3 Pro камерасида тасвирни барқарорлаштириш тизими мавжуд.
Булардан ташқари, Oppo Reno 3 Pro иккита динамикка эга бўлган кам сонли замонавий смартфонлардан биридир. Стереодинамиклардан бири корпус қиррасининг юқори, иккинчиси эса пастки қиррасига ўрнатилган. Ушбу девайс яна Dolby Atmos технологиясини ҳам қўллаб-қувватлайди.
Oppo Reno 3 Pro корпуси ўлчамлари 159,4х72,4х7,7 миллиметрга, вазни эса 171 граммга тенг. Контактсиз тўловлар учун NFC чипли ушбу смартфон ColorOS 7 график қобиғи остидаги Android 10 операцион тизими билан чиқарилган.
ЎҚИНГ: Redmi K30’нинг тақдимотда айтилмаган сири фош бўлди! (+«жонли» видео)
Гарчи Xiaomi яқиндагина намойиш этган ҳамёнбоп Redmi K30 5G флагмани Snapdragon 765G платформали дунёдаги илк смартфон бўлса-да, савдога ҳали 7 январда чиқади. Ушбу процессор базасидаги Oppo Reno 3 Pro учун эса аллақачон олдиндан буюртмалар қабул қилина бошлаган. Бугина эмас, Oppo Reno 3 ҳамда Reno 3 Pro учун фақатгина Хитойнинг ўзида бир кунда 1,46 миллион киши буюртма расмийлаштирилган!
Олдиндан қилинган буюртмаларнинг 580 000 таси оммабоп JD.com онлайн дўкони орқали расмийлаштирилган. Бундан ташқари, мазкур туркум TMall интернет-дўконида бутун йил бўйича олдиндан қилинган буюртмалар бўйича рекорд ўрнатган.
Айтиш керакки, Oppo Reno 3 учун олдиндан буюртма қилган харидорлар 31 декабрдан уни қўлларига олишади; Reno 3 Pro эса буюртмачиларга 10 январдан етказиб берилади.
ЎҚИНГ: «Ўзбектелеком»: 1 январдан нархлар 56 минг сўмгача пасаймоқда!
