2020 йилнинг биринчи ярмидаёқ Apple чиқарадиган 6 гаджет
Машҳур таҳлилчи Мин-Чи Куо купертинолик корпорациянинг бу йил жами беш хил янги айфон, сўнг «металл совун» ва iPhone SE 2 Plus ҳам тақдим этишини айтган. Куни кеча эса у Apple шу йилнинг ярмигача чиқарадиган гаджетлар бўйича прогнозини эълон қилди.
ЎҚИНГ: iPhone 12 Pro’лар рекорд ҳажмли «оперативка»га эга, лекин Samsung ва Xiaomi флагманлари...
Адашмас таҳлилчига кўра, «тишланган олмали» компания шу йилнинг биринчи ярмидаёқ қуйидаги девайсларнинг намойишини ўтказади:
- Экрани 4,7 дюймлик iPhone 9 (дастлаб унинг iPhone SE 2 номи остида чиқиши кутилган) смартфони.
- Янгиланган iPad Pro – флагман планшет. Унинг уч модулли бош камераси тўлдирилган борлиқ технологияси билан ишлаш учун 3D-сканерлашни ҳам қўллаб-қувватлайди.
- Янги MacBook Pro / Air – бу икки ноутбукдан қайси модели чиқиши ҳозирча аниқ эмас. Миш-мишларга кўра, Apple худди 16 дюймлик MacBook каби клавиатурага эга бўлган, диагонали 13 дюйм ўлчамли MacBook Pro тайёрламоқда.
- AirTag – ўта кенг полосали алоқа технологиясини қўллаб-қувватловчи, брелокка ўхшаш митти қурилма. Уни калитлар шодасига ёки ҳамёнга бириктириб қўйиш ва йўқолган ёки ўғирланган ҳолларда тезда топиш мумкин бўлади.
- Флагман қулоқчин – инсайдер унинг тафсилотларига тўхталмасдан, фақат Bluetooth орқали ишлашини айтган. Айримлар бунинг Powerbeats 4 модели бўлишини тахмин қилишган, бироқ ҳозирги Powerbeats 3 қулоқчинлари флагман тоифасига кирмайди.
- Симсиз қувватловчи гиламча – бу ҳақида ҳам батафсил маълумот йўқ. Лекин бу 2017 йили эълон қилинган, австралияликлар «сотиб қўйган», охир-оқибатда бекор қилинган симсиз зарядлаш станцияси – AirPower эмаслиги аниқ.
Мазкур рўйхат қайта кўриб чиқилиши эҳтимоли ҳам бор, чунки коронавирус эпидемияси туфайли Apple’га бутловчи қисмларни етказиб берувчи ҳамкорларнинг фаолиятларида узилишлар бўлиши мумкин.
ЎҚИНГ: Энг қиммат айфон ҳам DxOMark рейтингида Apple’ни шарманда қилди