2022 йил биринчи чорагида энг кўп сотилган смартфон қайси эканлиги маълум бўлди
Халқаро маълумотлар корпорацияси (IDC) таҳлилчиси Франсиско Жеронимо ўз Twitter саҳифасида 2022 йилнинг илк чорагида энг кўп сотилган смартфонлар топ бешталигини эълон қилди. Унга кўра, рўйхатнинг учта ўрнини Apple'нинг сўнгги авлоддаги флагманлари банд қилган бўлса, қолган икки ўринни ўрта бюджетли Samsung телефонлари эгаллаган. Афсуски, смартфонларнинг қанча миқдорда сотилганлиги ёки уларнинг бозордаги улуши ҳақида маълумот берилмаган.
Суратдан кўриш мумкинки, Apple'нинг iPhone 13 смартфони бир неча йил аввалги дизайн билан чиқарилганига қарамай жорий йилнинг биринчи уч ойлигида энг кўп сотилган бўлган. Қолган рақобатчиларга қарайдиган бўлсак, Apple флагмани ўзининг бошқа моделдагилари билан тўқнаш келганга ўхшайди. Шундай қилиб, кейинги фахрли иккинчи ўринни ҳам Apple ўтган йили тақдим қилган iPhone 13 қаторидаги смартфон, iPhone 13 Pro Мах модели қўлга киритган ва бундан одамлар каттароқ экран, яхшироқ камера ва узоққа етувчи батарея қуввати учун кўпроқ пул тўлашга тайёр эканликларини билиш мумкин. Шунингдек, яна бир iPhone 13 модели, iPhone 13 Pro Samsung бюджет смартфонидан кейинги тўртинчи ўринни банд қилган.
Apple'нинг деярли барча юқори даражадаги, қиммат смартфонлари топ ўринларга давогарлик қилаётган бир вақтда Жанубий Кореялик Samsung компаниясининг фақат ўрта даражадаги смартфонлари топ бешликка кира олган холос. Ўтган 2021 йилда энг кўп сотилган телефон бўлган Galaxy А12 ҳали ҳам энг кўп харид қилинаётганлар орасида ва у бугунги рўйхатнинг учинчи ўрнини эгаллаган. Galaxy А32, яна бир ўрта бюджетли смартфони эса йилнинг биринчи чорагида энг кўп сотилган бешинчи смартфони бўлиб, рўйхат у билан якунланади.
