2035 йилда видеокарталар қандай кўринишга эга бўлади? (+Фотожамланма)
Intel компанияси дискрет видеокарталар бозорига киришга ҳаракат қилишни бошлаганига кўп бўлмади ва ҳозирча унинг бозорда қандай рол ўйнаши ноаниқ. Бироқ компания имкон топди дегунча, GPU бозори ўзи учун қанчалик аҳамиятга эга эканлигини таъкидлаб келмоқда. Computex 2019 кўргазмасида ҳам Intel ўз режаларини айтиб ўтишни эсдан чиқармади ва буни оригинал кўринишда ифодалаб берди.
Компаниядагилар бироз фантазия қилган ҳолда, -карталар 15 йилдан сўнг қандай кўринишини ифодаловчи консептлар жамланмасини намойиш қилди. Ушбу рендерлар таниқли дизайнер Криштиану Сикейра (Cristiano Siqueira) га тегишли. Тўғрида, ҳаммага ҳам видеокарта чизишни ишониб топшириб бўладими!
Intel Prometheus Concept
Intel Gemini Concept
Intel Oblivion Concept
Intel Sirius Concept
Intel Andromeda Concept
Суратлар оригинал чиққан, аммо барибир ҳақиқатдан анча йироқ кўринмоқда. Сабаби, 15 йилдан кейин ҳам PCIe x16 слоти ҳамда унга мўлжалланган улкан тирқиш сақланиб қолиши амри маҳол. Шунингдек, катта эҳтимол билан қўшимча қувватлаш учун тирқиш ва совутиш парраги ҳам корпусни тарк этиши мумкин. Бир сўз билан айтганда, нафақат визуал кўринишни, балки техник хусусиятларни ҳам инобатга олиб ўтиш лозим эди. Бошқа тарафдан, 2035 йил видеокарталари суратларидаги Intel ёзуви компаниянинг ушбу сегментда ўзи учун мустаҳкам жойни кўзлаб қўйгани ҳақида сўзламоқда. Кўрамиз, компаниянинг 15 йиллик башорати тўғри чиқармикан.
