27 октябрь – Android 2.0 Eclair версияси чиқарилган сана
2009 йилнинг 27 октябрь куни Google компанияси Android дастурининг 2.0 Eclair версиясини чиқарди. Янги версия аввалги Android 1.6 Donut версиясининг ўрнини эгаллади. Android 2.0 Eclair версиясида Google’нинг бир нечта хизматлари иши йўлга қўйилди, бундан ташқари “яшил роботча” HTML 5 протоколини қўллаб-қувватлашни ўрганди.
Android 2.1 версияси чиқарилгач, дастурда “жонли гулқоғозлар” пайдо бўлди ва блоклаш экранига бир қатор ўзгаришлар қўлланди. Ferra сайтининг ёзишича, АШҚнинг Verizon оператори томонидан сотилган Motorola Droid смартфони Android 2.0 Eclair версияси ўрнатилган илк қурилма бўлган.
Юқоридагилардан ташқари, Android Éclair’га SMS’лар ичида қидириш, фотоаппарат чақноғи, камера иловасида рақамли катталаштириш, Bluetooth 2.1, ҳамда энг асосийси, экраннинг янги ўлчамлари ва аниқлик даражаларини қўллаб-қувватлаш функциялари татбиқ этилди. Шунингдек, мультитач фаолияти ҳам яхшиланган эди. Мазкур версия операцион тизимни янги поғонага кўтаришда муҳим роль ўйнаган.
