"48 мегапиксел? Оз қолибди, Apple!" - Samsung

Apple'нинг iPhone 14 смартфонлари тақдим қилинган "Far Out" тақдимотидан бир неча кун аввал Samsung ўзининг сўнгги флагман смартфон ва букламафонлари реклама видеосини чиқарган эди. Унда Жанубий Корея компанияси ўзининг телефонлари афзаллик томонларини мақтаб, янги чиқадиган iPhone'лар бундай инновацион хусусиятларга эга бўлмаслиги айтиб, Apple устидан кулган. 

Бироқ, Samsung биргина реклама видеоси билан тўхтаб қолмайдиган кўринади, компаниянинг АҚШдаги расмий Twitter саҳифасига Apple'нинг iPhone'ларида йўқ бўлган хусусиятлар таъкидланган твитлар пайдо бўлди.

Бир неча кун олдин Apple тақдим қилган iPhone 14 смартфонларига ишора қилган ҳолда "Чоршанбада тақдим қилинган янги "инновацион" қурилмаларга бизнинг реакциямиз ҳақида қисқача" дея гап бошлайди Samsung. Биринчи ва иккинчи твитлар компания ўтган ойда тақдим қилган Galaxy Z Fold/Flip 4 букламафонларига қаратилган бўлиб, Samsung ўзининг "яқин дўсти"га "Биз 2 йил, 5 ой, 20 кундан бери буклана оламиз" дейди реклама постерида. Келтирилган саналар букламафонларнинг илк марта чиқарилган кунлар бўлиб, бу билан Жанубий Корея компанияси Apple'га қанча ортда эканлигини кўрсатиб қўймоқчига ўхшайди.

Гарчи смартфонларда олинган суратлар сифати уларнинг камераларидаги мегапикселларга боғлиқ бўлмасада, Samsung ҳали ҳам Apple билан "мегапикселлар пойгаси" ўйинини ўйнашда давом этаётган кўринади. Навбатдаги твитда Жанубий Корея компанияси ўзининг Ultra смартфонлари 2 йил-у 6 ойдан бери 108 мегапикселли камерага эга эканлигини айтиб, Apple'нинг янги чиққан iPhone 14 Pro смартфонлари эндигина 48 мегапикселга янгиланганини мазах қилади.

Бундан ташқари, Samsung илгари куни ҳам iPhone эгаларини "букланадиган томонга" ўтишга ундайдиган реклама ролигини ҳам чиқарган эди. Унда ўз (iPhone) смартфонига содиқ қизнинг қандай қилиб бошқа смартфон, бўлганда ҳам букланадиганидан сотиб олишини кўриш мумкин.

ЎҚИНГ: Instagram'га тез кунда репост қилиш функцияси қўшилади

Terabayt.uz сайтининг видеолари: Youtube'даги каналимизда!
#Apple #Samsung