5G-смартфон ва ноутбукларга мўлжалланган Snapdragon 850 илк бор бенчмаркда синаб кўрилди
Qualcomm компанияси ушбу йилнинг сўнгида 7 нанометрлик технологик жараён базасидаги илғор Snapdragon 855 процессорини тақдим этишни режалаштирган. Хитойлик смартфонсозлардан бири аллақачон ушбу чип билан ишловчи илк 5G-гаджетни тақдим этишини айтиб мақтанган ҳам.
Аммо ундан ҳам аввал америкалик чипсознинг Snapdragon 850 процессори базасидаги девайслар дунё юзини кўради. Ўз «аждод»ларига нисбатан бирмунча яхшиланган ушбу чип илк бор бенчмаркда синаб кўрилди. Буни қарангки, у ўша «алдоқчи» Lenovo’нинг аллақандай номаълум қурилмасига ўрнатилган!
Мана, Snapdragon 850 чипли ушбу гаджетнинг Geekbench’да намоён этган самарадорлик кўрсаткичлари қуйидагича:
Гувоҳи бўлиб турганингиздек, Lenovo 81JL қурилмаси якка ядроли тестда 2 263 балл, кўп ядроли синовда эса 6 947 очко олган. Бу натижалар Snapdragon 835 кўрсаткичларидан жудаям катта эмас – унга асосланган девайслар ўрта ҳисобда тегишлича 1 800 ва 6 500 балл тўпламоқда.
Яъни, Snapdragon 835 билан солиштирганда, Snapdragon 850 процессори битта ядроли синовда 25 фоизга, кўп ядроли имтиҳонда эса 7,3 фоизга устун келаётир. Бироқ мазкур тест бозорга чиқарилган смартфонда эмас, балки ҳали унинг прототипида синаб кўрилган. Тижорий мақсадда тақдим этилган смартфонда самарадорлик кўрсаткичлари бундан юқори бўлиб чиқиши ҳам мумкин. Qualcomm’нинг ўзи мазкур чип тақдимотида унинг самарадорлиги аввалгисига нисбатан 30 фоизга ошишини маълум қилганди.
Яна бир ўзига хослиги шундаки, Snapdragon 850 чипи ноутбукларга ҳам ўрнатилади ва Windows 10 платформаси билан мувофиқлаштирилади. Lenovo’дан ташқари, Snapdragon 850 процессори базасидаги гаджетларни ASUS, HP ҳамда Samsung ҳам ишлаб чиқармоқчи.
ЎҚИНГ: Qualcomm "5G-смартфон" ишлаб чиқарувчи брендларни эълон қилди
