81 ёшли япониялик онахон iPhone учун дастур ишлаб чиқди
80 ёшдан ошган Масако Вакамиякомпьютердан қандай фойдаланишни сизу биздан кам билмайди. Ва, айни дамда япониялик тиниб-тинчимас онахон iPhone учун дастурлар яратиш билан банд.
Умрининг ёрқин дамлари мамлакатнинг етакчи банкларининг хизматида ўтган Масако Вакамия нафақага чиққач, 60 ёшида компьютердан фойдаланишга қизиқиб қолиб, ниҳоят ўтган ҳафтада, 81 ёшида муаллифлигидаги илк иловани тақдим қилди.
Онахоннинг iOS тизимига мўлжалланган мобиль иловаси Hinamatsuri (японларнинг “Қизлар куни” байрами) фестивали жараёнида япон қизларининг миллий қўғирчоқларни ёши ва даражасидан келиб чиқиб, тўғри териб чиқиш бўйича билимларини мустаҳкамлайди.
Hinadan – японча “hina”, яъни ‘қўғирчоқ’ ва “dan” — ‘тартиб’ деган маънони англатади. Яъни, ўйин қоидасига кўра, фойдаланувчи 12 та миллий қўғирчоқни ижтимоий ўрнидан келиб чиқиб, дисплейда тизиб чиқиши керак.
Шунингдек, Масако Вакамия япон ва инглиз тилларида юритадиган блогларида ўзининг саёҳатларига доир видеоларни, Excel каби фойдали дастурлардан фойдаланиш бўйича эълон қилиб боради.
