A1 ортидан A1 Plus: Redmi яна бир янги бюджет синфидаги смартфонни тақдим этди
Xiaomi суббренди бўлган Redmi ўтган ойнинг бошида Ҳиндистонда Redmi A1 моделини тақдим этган эди. Кеча компания ушбу смартфоннинг Plus моделини тақдим этди.
Қурилманинг 2/32ГБ ҳамда 3/32ГБ хотирага эга тури бўлиб, уларнинг нархи мос равишда 91 ҳамда 103 долларни ташкил қилади. Смартфон қора, кўк ҳамда яшил рангларда бўлади.
Redmi A1 Plus моделини тўлиқ янгиланган смартфон дейиш қийин. Аввалги моделдан уни бармоқ изи сканери борлиги ҳамда 3ГБ тезкор хотирага эга эканлиги ажратиб туради холос. А1 модели фақатгина 2/32ГБ хотира билан сотувга чиққан.
Янги смартфон Helio A22 чипи билан жиҳозланган. У Android 12 (Go Edition) операцион тизимига асосланган MIUI 12 график қобиғида ишлайди. Олд томонда HD+ резолюциядаги 6.52 дюймли дисплей жойлашган. Дисплейдан 5МП селфи камера ўрин олган.
Орқа панелга 8МП асосий ҳамда QVGA камералар ўрнатилган. Қурилма 3.5 мм аудио жек портига эга, хотирани microSD картаси билан 512ГБ гача чўзиш мумкин. Смартфон 5,000 мАс сиғимли аккумулятор билан жиҳозланган бўлиб, уни microUSB порти билан 10 ватт тезликда қувватлаш мумкин.
