Acer геймерлар учун ғайриоддий ноутбук-трансформер ишлаб чиқди (+видео)

31 августдан 5 сентябргача Берлинда бўлиб ўтадиган IFA 2018 кўргазмасининг очилиши олдидан Acer компанияси ажойиб янги гаджетини расман намойиш этди. Predator Triton 900 деб номланган ушбу қурилма ҳам ноутбук, ҳам планшет тарзида фойдаланишга мўлжалланган.

ЎҚИНГ: Microsoft арзонлаштирилган Surface Book 2 ишлаб чиқарди

Predator Triton 900 – ўйин ўйновчиларга мослаштирилган ўзига хос трансформердир: унинг экрани механизацияланган шарнирда ўзининг горизонтал ўқи атрофида айлана олади.

Девайснинг сенсорли дисплейи 4K UHD форматида бўлиб, Nvidia G-Sync технологиясини қўллаб-қувватлайди. Бошқа ноутбуклардан асосий фарқи – клавиатурали асосини жойидан қўзғатмаган ҳолда Predator Triton 900 экранини фойдаланувчига яқин келтириш ва унга қулай бурчак остида жойлаштириш мумкин. Бундан ташқари, уни планшет режимида ҳам ишлатса бўлади.

Ушбу ноутбук AeroBlade туркумидаги тўртинчи авлод 3D-вентиляторлари ёрдамида совитиладиган тизимга эга. Девайснинг тачпадли механик клавиатураси эса рақамли блок режимига ҳам ўта олади.

Мана, Predator Triton 900 моделига бағишлаб ишланган расмий видеони бир кўринг – унга ошиқ бўлиб қолишингиз аниқ:

Acer ҳозирча бу ишланмасининг техник хусусиятлари борасидаги тафсилотларни сир тутмоқда. Шунингдек, Predator Triton 900 нархи ва савдога чиқарилиш вақти ҳам номаълум.

ЎҚИНГ: ASUS ва MSI'да муаммо: ўйин ноутбуклари харидорларини йўқотмоқда