Афсонавий бренд бирданига иккита «қўшкўз», ромсиз смартфон тақдим этди

BlackBerry компанияси ҳиндистонлик ҳамкори – Optiemus билан биргаликда BlackBerry Evolve ҳамда Evolve X смартфонларини расман намойиш қилди. Ҳар иккала модел ҳозирда урф бўлган ромсиз дизайнга, қўшалоқ камерага ва сиғимдор аккумуляторга эга.

ЎҚИНГ: BlackBerry Ghost кучли батарея билан таъминланди

BlackBerry Evolve ва Evolve X смартфонларининг иккаласи ҳам томонлари ўзаро 18:9 нисбатга эга бўлган 5,99 дюймлик, ромсиз экран билан жиҳозланган. Дисплейларининг аниқлиги Full HD+ форматида (2160х1080 пикселли). Яна бошқа умумий жиҳатлари: олд камераси 16 мегапикселли, доимий хотираси 64 гигабайтлик, орқа панелида дактилоскопик датчиги бор. Ҳар иккаласида 4000 мА/соатлик аккумулятор бўлиб, тезкор ва симсиз қувватлаш технологияларига эга. Бу смартфонлар BlackBerry’нинг DTEK график қобиғи остидаги Android 8.1 Oreo операцион тизими бошқарувида ишлайди.

Фарқли жиҳатларига келадиган бўлсак: BlackBerry Evolve асосий камераси 13+13 мегапикселли модулларга, 4 ГБ тезкор хотирага ва Qualcomm Snapdragon 450 процессорига эга. Evolve X моделига эса 12+13 мегапикселли модулларга эга бош камера, 6 гигабайтлик тезкор хотира ҳамда Snapdragon 660 чипи ўрнатилган.

Хабарга кўра, BlackBerry Evolve смартфони шу ойнинг ўзидаёқ тахминан 365 долларлик нарх билан савдога чиқарилади. BlackBerry Evolve X савдоси эса сентябрда бошланади; унга тахминан 510 доллар нарх белгиланган.

ЎҚИНГ: BlackBerry KEYone яқинда Android Oreo билан янгиланади