Аккумуляторлар “жанги”: iPhone 7 Plus ҳамда Galaxy S8+
Кўпчиликнинг фикрича, 29 март куни тақдим қилинган Galaxy S8 ҳамда S8+ смартфон бозорининг айни пайтдаги “қаҳрамон”лари бўлмиш iPhone 7 ва iPhone 7 Plus билан куч синашсалар, “жанг” янада қизийди. Бу гал Phone Arena нашрининг синовларида улар қувватдорлик, яъни аккумуляторларининг чидамлилиги бўйича куч синашдилар.
Аммо, кутилмаган натижалар рўй берди. Galaxy S8+ синов вақтида тўлиқ қувват билан 8 соат тинимсиз ишлаган бўлса, 1960 мА соат қувватли iPhone 7 девайси 7 соату 46 дақиқа фаолият кўрсатган. 2900 мА соат ток сиғимига эга iPhone 7 Plus эса энг яхши натижани кўрсатиб, 9 соат 5 дақиқа давомида “яшаш”учун курашган. Синов жараёнида барча смартфонлар олдига бир хил вазифа қўйилган ва уларнинг экран ёруғлиги ҳам бир хил даражада, яъни 200 нит бўлган.
Samsung Galaxy S7 edge билан солиштириб кўрганда, Galaxy S8’нинг тўлиқ қуввати 1 соат узоғроққа етади. Ваҳоланки, уларнинг ҳар иккаласи ҳам 3500 мА соат электр токи сиғимига эга аккумулятор билан таъминланган. Galaxy S8’даги техник жараёни 10 нанометр бўлган процессорнинг самарадорлиги эвазига шундай бўлди. Айтиш керакки, аккумуляторининг ток сиғими 3500 мА соат бўлган Galaxy S8+ нисбатан улкан, 6,2 дюймли дисплей билан таъминлангани учун ҳам iPhone 7 Plus’га мағлуб бўлган.
Юқоридаги жадвалда бир нечта Android-смартфонларнинг, жумладан Google Pixel, OnePlus 3T ҳамда Huawei P10’нинг тўлиқ қувват билан неча соат ишлай олиш вақтлари келтирилган. Улар орасида энг паст кўрсаткич OnePlus 3T’га тегишли бўлиб, унинг тўлиқ қуввати 5 соат 41 дақиқага етган.
Samsung тақдимот вақтида Galaxy S8 батареяси “аждоди”никига нисбатан секинроқ ишдан чиқишини маълум қилган эди. Хусусан, Galaxy S7 ва Galaxy S7 edge’даги аккумуляторлар ҳар йили 20 фоизгача қувватдорлигини йўқотса, Galaxy S8’да бу 5%ни ташкил қилади.
