Алишер Усмонов кутилмаганда Mail.Ru Group бошқарувидан воз кечди

Асли ўзбекистонлик бўлган Россия миллиардери, USM Holdings асосчиси Алишер Усмонов кутилмаган ишга қўл урди. Бизнесмен Mail.Ru Group’даги ўз улушини компания бош директори Борис Добродеев бошқарувига ўтказиб берди.

ЎҚИНГ: Алишер Усмоновга тегишли МегаФон компанияси Uzmobile билан келишув имзолади

Бундан кейин Mail.Ru Group директорлар кенгашида унинг номидан айнан Борис Добродеев овоз беради. Бу эса А.Усмоновнинг компания устидан назоратни қўлдан бой берганини англатади. Шу билан бирга, Mail.Ru Group иқтисодий тузилишида қандайдир ўзгариш юз бермайди, демоқда манбалар.

Айтиш керакки, Алишер Усмонов 2012 йилда «ВКонтакте», 2016 йилда эса ўзининг USM Holdings компаниясидаги назоратидан менежмент фойдасига воз кечган эди.

Кузатувчиларнинг тахминларига кўра, Алишер Усмонов шу йўл билан АҚШ томонидан тайёрланаётган санкцияларга тайёргарлик кўрмоқда. Турли маълумотларга қараганда, АҚШ Рождество арафасида бир қатор россиялик миллиардерларга нисбатан шахсий санкцияларни қўллаши мумкин. Агарда А.Усмоновга нисбатан ҳам шундай санкция қўлланса, бу ҳол унинг назоратидаги компанияларни қийин аҳволга солиб қўйиши турган гап. Шу боис миллиардер ўз назоратидаги улушини бошқаларга ўтказиб, Mail.Ru Group’ни қийинчиликлардан сақлаб қолишни кўзлаётган бўлиши эҳтимоли юқори.

ЎҚИНГ: Алишер Усмонов энг яхши стикер, карикатура, пародия учун ҳар ҳафта битта iPhone 7 Plus совға қилади