Android 10 тизимли энг митти, лекин тўлақонли ва кучли смартфон чиқди (+видео)
Unihertz компанияси ўзининг митти, аммо тўлақонли функцияларга эга бўлган смртфонлари билан машҳур. Жумладан, икки йил аввал у Atom русумли қурилмасини тақдим этган, кейин эса...
ЎҚИНГ: Видео: энг митти смартфоннинг мустаҳкамлигини аямасдан синаб кўришди!
Энди эса Unihertz компанияси Kickstarter краудфандинг майдончасида навбатдаги – Jelly 2 моделидаги смартфонини тақдим қилди. У айни дамда Android 10 операцион тизим талқинига эга бўлган энг митти смартфон ҳисобланади – экранининг ўлчами диагоналига атиги 3 дюймни ташкил этади!
Jelly 2 дисплейи 480х384 пикселлик аниқликда тасвир узатади. Унинг аккумулятори эса 2000 мА/соатлик ток сиғимига эга.
Яна бу смартфонча контактсиз тўловлар учун NFC модули билан ҳам таъминланганига нима дейсиз!?
ЎҚИНГ: Дунёдаги энг митти мини-компьютер намойиш қилинди
Миттивойнинг бошқа жиҳатлари ҳам жойида: тезкор хотираси нақ 6, доимий хотираси бўлса 128 гигабайтлик; тағин microSD-карта уячаси ҳам мавжуд. Унинг аппарат таъминоти асосида MediaTek Helio P60 платформаси ётади. Бу процессорнинг имкониятлари мазкур смартфон учун ҳатто ортиқчалик ҳам қилади – ахир, 3 дюймлик экранда ҳеч ким PUBG Mobile каби «оғир» ўйин ўйнамаса керак.
Unihertz Jelly 2 орқа панелида 16 мегапикселлик бош камера ва унинг фоточақноғи, шунингдек бармоқ изи сканери ҳам бор. Смартфоннинг олд камераси эса 8 мегапикселлик аниқликда.
Қуйидаги видеолавҳада Unihertz Jelly 2 билан батафсилроқ танишамиз:
Unihertz компанияси Jelly 2 учун жамоавий молиялаштириш доирасида 129 АҚШ доллари миқдорида нарх белгилаган.