Android 14'нинг илк превю версияси чиқарилди!
Google ўзининг Android операцион тизимининг навбатдаги катта янги версияси, Android 14'нинг илк превю (олдиндан кўриш) версиясини чиқарди.
Маълум бўлишича, янги версия янада каттароқ фонтлар, ҳар бир илова учун тил созламалари, грамматикада овознинг ўзгаришини қўллаб-қувватлаш, хавфсизлик масаласида иловаларни блоклаш ва бошқа турли ўзгаришларни ўз ичига олади. Булар ҳақида батафсил кейинги мақоламизда танишишингиз мумкин.
Таъкидлаш жоизки, ушбу DP1 версия фақат ишлаб чиқувчилар ёхуд дастурчилар учун бўлиб, у кундалик фойдаланиш учун мўлжалланмаган. Албатта, унда жуда кўп хатоликлар бўлади ва Google ушбу масалаларда бир неча ой дастурчилар фикр-мулоҳазалари билан танишади, тузатишлар киритилади. Агар муаммоларга дуч келишдан қўрқмасангиз, Android 14'ни ҳозироқ синаб кўришингиз мумкин. Фақат уни қўлда юклаб олиш керак бўлади. Аммо, агар сиз смартфонингиз барқарор ҳолатда ишлашига одатланган бўлсангиз, Android 14'нинг тўлиқ версиясини кутганингиз маъқул.
Юқоридаги вақт жадвалига қарайдиган бўлсак, Android 14'нинг оммавий бета версияси апрел ойида чиқарилади. Барқарор версия эса июл ойидан кейин катта эҳтимол билан августда чиқарилиши кутилмоқда.
Ҳозирда Android 14'нинг Developer Preview версияси Pixel 4а 5G, Pixel 5, Pixel 5а, Pixel 6, Pixel 6 Pro, Pixel 6а, Pixel 7 ва Pixel 7 Pro, шулар билан бир қаторда, Android эмулятори учун мавжуд. Янги версия 2023 йилнинг феврал ойи хавфсизлик янгиланиши билан келади.
ЎҚИНГ: Microsoft ChatGPT билан кучайтирилган Bing қидирув тизимининг янги версиясини тақдим қилди!
