Android борасида Samsung’нинг энг улкан хатосини биласизми?
Энди Рубин ўзининг кичик стартапи доирасида рақамли фотокамералар учун яратилган Android операцион тизимини 2004 йили бошқа йўналишга мослаштиради. Яъни, тизимни у ўша даврда янги кучайиб бораётган қурилмалар – смартфонларга мослаб ўзгартиради ва бу лойиҳасини молиялаштириш учун йирик компаниялардан бири билан ҳамкорлик қилиш пайига тушади.
ЎҚИНГ: Android асосчисининг компанияси «ақлли» кўзойнак учун патент олди
Шу тариқа, Рубин ўз маҳсулотини биринчи бўлиб Samsung компаниясига сотишни кўзлаган. Томонлар бу корпорациянинг Сеулдаги штаб-квартирасида учрашиб, лойиҳани муҳокама қилишган. Аниқроғи – Энди Рубин ўзининг ушбу маҳсулоти яқин беш йилда бозордаги етакчи мобил операцион тизимларидан бирига айланади, дея нуфузли компания вакилларини ишонтиришга уринади.
Корейслар эса бу пайтда иштиёқ билан ўз маҳсулотини мақтаётган, унинг ҳали амалга ошмаган ютуқлари ҳақида зўр бериб гапираётган Рубинга истеҳзо билан қараб ўтиришарди. Ўша даврдаги иккита йирик – Symbian ҳамда Windows Mobile мобил операцион тизимларига Android рақобатчи бўла олишига Samsung вакиллари ишонишмаганди.
Энди Рубин ўз нутқини тугатгач, орага бироз вақт жимлик чўкади – Samsung вакиллари маъноли нигоҳлар билан бир-бирига қараб олишади. Уларнинг барчаси битта фикрга келганди: «Бу йигитча бизни аҳмоқ қилмоқчими!?»
Ниҳоят Samsung директорлар кенгашининг раиси бу фикрни тилига чиқаради: «Хўш, буни сиз қай тариқа амалга оширмоқчисиз? Режаларингизни амалга ошириш билан шуғулланувчи дастурчилардан иборат қўшин тўплаганмисиз аллақачон? Ҳа-я, сизнинг жамоангиз атиги олти кишидан иборат-ку. Эсингиз жойидами ўзи?»
Рубиннинг эслашича, шу гапдан кейин залдагилар пиқиллаб кулишганини ўзи ҳам эшитган ва лойиҳасини Samsung’га олиб келиб хато қилганини англаган. Тез орада у Google асосчиларидан бўлган Ларри Пейдж билан учрашади ва бу компания Android дастурини молиялаштиришга рози бўлади. Маълум муддат ўтганидан кейин Google стартапни 50 миллион АҚШ доллари эвазига сотиб олади ва дастурни яратган жамоани ўз сафига қабул қилади.
Қизиғи шундаки, ўша куннинг эртасигаёқ Samsung раҳбарларидан бири Энди Рубинга қўнғироқ қилиб, учрашишни сўрайди. Компания унга ўша мобил операцион тизим лойиҳасига алоқадор жуда-жуда қизиқ таклиф бермоқчи эканлигини айтади.
Кўриниб турибдики, биринчи учрашувда Android лойиҳасининг устидан кулган Samsung’чилар унинг истиқболини кейинроқ пайқаб қолишган. Лекин кеч бўлганди: бу пайтда мазкур дастур аллақачон Google’га қарашли, Рубиннинг ўзи эса ушбу йирик компаниянинг катта вице-президенти лавозимига қабул қилинган эди.
Samsung ўшанда ўз тарихидаги энг йирик хатолардан бирига йўл қўйганини сиз ҳам пайқагандирсиз? Ҳозирда «яшил роботчали» гаджетлар ишлаб чиқариш бўйича мазкур корпорация дунёда етакчи бўлса-да, айнан уларнинг операцион тизими бўйича Google қоидаларига бўйсунишга мажбур.
