Android'нинг "локдаун" режимидан қандай фойдаланилади?
Ҳаммамиз маълум бир сабабларга кўра ўз телефонларимизни қулфлашга одатланганмиз ва бунда турли хил методлардан фойдаланамиз, лекин бу усулларнинг ҳаммаси ҳам бошқалари каби хавфсиз эмас. Масалан, юзни аниқлаш технологиясини алдаш сиз ўйлаганданда осонроқдир. Айнан шу усулда қулфланган смартфони бегона одамнинг қўлида тасодифан очилиб кетиш ҳолати кимлардадир содир бўлгани аниқ. Ёки кўпчилик фойдаланадиган бармоқ изи билан телефонни қулфлаш методи ҳам баъзан панд бериб қўйиши мумкин ва шу сабаб пайдо бўладиган кўнгилсиз воқеаларни олдини олиш учун сизга "локдаун режими" керак бўлиши мумкин.
Android'ни қулфлашдаги энг хавфсиз усуллар - бу пароллаш, PIN кодлаш ва нақшли қулфлаш усулларидир. Локдаун режими ёқилганда эса юқорида унчалик хавфсиз эмас деб айтилган юзни, бармоқни аниқлаш технологиялари (ва агар ёқилган бўлса, Smart Lock ҳам ўчириб қўйилади) ва фақат нақшни чизиш ёки PIN кодни киритиш ёки паролни териш, қайси бири ўрнатилган бўлса, ўша билан телефонни очиш мумкин бўлади.
Локдаун режими Android'нинг тўққизинчи ёки ундан юқори бўлган версияларида мавжуд ва уни Samsung Galaxy смартфонида ёқиш учун қуйидаги амалларни бажаришингиз керак:
Смартфонингиздан Settings (Созламалар) иловасига киринг ёки экран юқорисини пастга тортиш билан пайдо бўладиган панелнинг ўнг юқори бурчагидаги тишли ғилдирак иконкасини босинг.
Созламалар ичидан Lock Screen (Экранни қулфлаш) бўлимига ўтинг.
У ердан эса Secure lock settings (Хавфсиз қулф созламалари) ни очинг. Унга киришда сиздан жорий PIN код ёки нақш қулфи ёки парол, қайси бирини ўрнатган бўлсангиз ўша сўралади.
Унга кирганингиздан кейин Show Lockdown option (Локдаун танловини кўрсатиш) функциясини ёқиб қўйинг.
Тамом.
Ана энди локдаун режимини смартфоннинг ёқиш тугмасини босиб туриш билан чиқадиган менюдан топишингиз ва ёқишингиз мумкин.
Аввал айтилганидек, локдаун режими аввалдан ўрнатилган юз ёки бармоқни изини аниқлаш, шунингдек, Smart Lock билан қулфдан очиладиган методларни ўчириб қўяди ва телефонни очиш учун нақшни чизиш ёки PIN кодни киритиш ёки паролни териш керак бўлади.
Эслатма: локдаун режими "бир марталик" бўлиб, телефон локдаун режимидан очилганидан кейин у автоматик тарзда ўчиб қолади ва ундан яна фойдаланмоқчи бўлсангиз уни ёқиш тугмасини босиб туриш орқали чиқадиган менюдан қайта ёқишингиз керак бўлади.
