Антиқа рейтинг: ҳалокатли селфилар бўйича кимлар етакчи?

  •   DiMaX
  •  1343
  •  04.10.2018 17:20

Антиқа рейтинг: ҳалокатли селфилар бўйича кимлар етакчи?

Ҳозирги кунда селфи жуда оммалашгани маълум, аммо бу айрим ҳолларда кишиларнинг жароҳат олишига, ҳатто ўлимига ҳам олиб келмоқда. Тиниб-тинчимаган тадқиқотчилар эса селфи сабабли юзага келган ўлимларни ҳам ўрганиб чиқиб, натижаларини эълон қилишибди.

ЎҚИНГ: Фотокамера қаршисида ҳалокат ёки селфи нега тақиқланмоқда?

Journal of Family Medicine and Primary Care нашрида эълон қилинган тадқиқот хулосаларига кўра, 2011 йилдан буён дунёнинг турли мамлакатларида 259 та «ҳалокатли селфи» ҳолатлари қайд этилган. Лекин ушбу расмий статистикага кирмай қолган ҳалокатлар ҳам борлиги аниқ.

Аниқланишича, селфи туфайли қийин вазиятга тушиб қолиш оқибатида ўлим топганлар сони бўйича Ҳиндистон мутлақ етакчи экан – нақ 159 ҳолат. Ундан катта фарқ билан орқада қолган – иккинчи ўриндаги мамлакат эса Россия бўлиб, у ерда 16 та «ҳалокатли селфи» қайд қилинган. «Кучли учлик»ни 14 та шундай ҳолат билан АҚШ якунлаб берган.

Бундан ташқари, селфи оламан деб жон берганларнинг 72 фоизини айнан эркаклар ташкил этади. Ҳолбуки, селфини аёллар кўпроқ яхши кўришади. Бунинг сабаби ҳам маълум: эркаклар (айниқса қони қайноқ йигитлар) одатда таваккалчиликка кўпроқ қўл уришади ва шу таҳликали лаҳзани кадрга муҳрлаб қўйишга қизиқишади.

Шунингдек, тадқиқотчилар селфи олиш чоғларида энг кўп ўлимга олиб келган сабабларни ҳам маълум қилишди. Бу – сувда чўкиб кетиш, транспорт сабабли ҳалок бўлиш ва баландликдан йиқилиб ўлиш экан.

Хулласи калом, келажакда бундай рўйхатга тушиб қолмаслик учун эҳтиёт бўлишни тавсия этамиз.

ЎҚИНГ: «Селфи»га ишқибозликни психиатрлар руҳий касаллик деб эътироф этишди

Хабарларни тез ва осон ўқиш учун Андроид иловамизни сақлаб олинг.