AnTuTu’нинг янги рекордчиси – Xiaomi Mi 9 тақдим этилди: 445 долларлик технологик мўъжиза!

DiMaX
3603
20.02.2019 15:34

Кутилаётганидек, Xiaomi компанияси бугун Mi 9 русумли флагман смартфонини расман намойиш этди. Шу пайтгача инсайдерлар маълум қилган хусусиятларидан ташқари ҳам у яна кўплаб илғор жиҳатларга эга экан!

ЎҚИНГ: Xiaomi илк симсиз портатив аккумуляторни чиқаряпти. Шу функцияни Mi 9’нинг ўзи ҳам бажаради!

Янги флагманни Xiaomi бош директори Лей Цзунь (Lei Jun) шахсан ўзи намойиш қилди. Мазкур қурилмага Samsung томонидан ишлаб чиқилган, диагоналига 6,39 дюймлик AMOLED-дисплей ўрнатилган. Тасвир сифати Full HD+ форматида бўлган экран 3,6 миллиметрлик ҳошиялар билан ўралган бўлиб, корпус олд юзасининг 90,7 фоизини эгаллайди.

Томчисимон «кемтик»ли экранга бешинчи авлод оптик бармоқ изи сканери ўрнатилган, унинг ишлаш тезлиги аввалгиларига нисбатан 25 фоизга юқори. Дисплей ҳимоясини Gorilla Glass 6 ҳимоя шишаси таъминлайди.

Xiaomi тақдимотда ушбу қурилмасининг енгиллигига ҳам эътибор қаратган – у 173 грамм тош босади. Масалан, айнан шундай ўлчамли iPhone XS Max ундан 35 граммга оғирроқ.

Mi 9 моделининг шиша корпусига алоҳида технология бўйича ранг берилган. Металл ялтироқлигини ва турли рангларга тўйинганлик эффектини бериш учун Xiaomi иккита ранг қатламини лазерли голографик жараён билан қайта ишлаган. Шунинг эвазига турли ёритилган шароитларда ва ҳар хил бурчак остида қараганда, смартфон корпуси ўзгача тусларда жилоланади.

Корпуснинг орқа панелида бош камера блоги эътиборни тортади. Унинг ҳошияси зангламас пўлатдан ясалган, устига эса тирналишлардан ҳимояловчи, 243 миллиметр квадратлик сапфир шишаси қопланган. Маросимда таъкидланишича, бундай ечимнинг қўлланиши камера блогининг таннархини 37 фоизга оширган.

Xiaomi Mi 9 учун, табиийки, Qualcomm’нинг энг илғор Snapdragon 855 процессори танланган. AnTuTu бенчмаркида ушбу девайс нақ 387 851 балл олиб, ҳозиргача тақдим этилган Android-смартфонлар орасида мутлақ ғолиб бўлиб турибди!

Смартфоннинг тезкор хотираси учун LPDDR4X чиплари, доимий хотираси сифатида бўлса UFS 2.1 модуллари қўлланган.

Xiaomi таъкидлашича, Mi 9 флагмани ўйинларга Kirin 980 платформасидаги рақибига нисбатан яхшироқ мосланган. Бунинг учун қўлланувчи Game Turbo технологияси ўйин давомида Adreno 640 график чипининг самарадорлигини 20 фоизга оширади. Бундан ташқари, «сунъий онг» ҳам иловаларнинг ишлашини шунақа кучайтириб беради.

Mi 9 бош камерасининг асосий датчиги – 48 мегапикселлик Sony IMX586 сенсоридир. Унинг объективи олтита унсурдан ташкил топган, кўриш бурчаги 79 даражага, максимал диафрагмаси эса F/1,75’га тенг. Қолган иккита модулдан бири 16 мегапикселлик (кенг бурчакли объективга эга) бўлса, иккинчиси 12 мегапикселлик (икки карра оптик зумни таъминловчи телеобъектив қўлланган).

Намойиш тадбирида таъкидланишича, Xiaomi Mi 9 бош камерасида гибрид фазали ва контраст автофокус қўлланади, яна лазерли ёрдамчи ҳисобига ёруғликсиз ҳам фокуслаш муаммо бўлмайди.

Айтиш керакки, Mi 9 флагмани DxOMark рейтингига кўра энг зўр Xiaomi камерофони бўлди. Умумий рейтингда эса у 107 балл билан Galaxy Note 9 ва iPhone XS Max’дан ўзиб кетди, фақат Huawei P20 Pro ва Mate 20 Pro ундан олдинда.

Mi 9 олд камераси дисплейдаги кичкина «ўйиқ»қа жойланган 24 мегапикселлик якка датчикни ўз ичига олади.

Xiaomi янги флагманини симсиз қувватлаш технологияси билан таъминлаган ва бунда ҳам анча афзалликка эришган – унинг қуввати 20 ваттга етади. Симли қувватлаш эса 27 ваттлик технология бўйича амалга оширилади ва смартфон жамланмасига айнан шундай қувватлаш ускунаси киритилган. Унинг ёрдамида аккумуляторнинг тўлиқ қувват олиши 60 дақиқада амалга ошади. Дарвоқе, Mi 9 батареяси 3300 мА/соатлик ток сиғимига эга.

Флагманга Android 9.0 Pie базасидаги MIUI 10 график қобиғи ўрнатилган. У иккита SIM-картани қўллаб-қувватлайди, 4G VoLTE, Wi-Fi (802.11ac), Bluetooth 5, GPS/ГЛОНАСС/Beidou, NFC технологиялари, USB Type-C порти билан жиҳозланган.

Ниҳоят, энг қизиғи – нархига ҳам етиб келдик... Дастлабки ҳисоб-китобларга кўра, Mi 9 нархи 3300 юандан бошланиши керак эди, бу эса 490 АҚШ долларига тенг. Аммо компания бош директори Лей Цзунь битта гапда қаттиқ туриб олди: флагман нархи 3000 юандан бошланиши керак, бу чегара психологик жиҳатдан катта аҳамиятга эга.

Натижада тезкор/доимий хотира ҳажми 6/128 гигабайт бўлган Mi 9 учун Хитойда 2999 юань (445 доллар) нарх белгиланди. Бошида режалаштирилган 3299 юанлик (490 долларлик) нарх эса 8/128 гигабайтлик флагманга насиб этди. Орқа қопқоғи шаффоф, хотира ҳажми 12/256 гигабайт бўлган Mi 9 бўлса 3999 юанга (595 долларга) баҳоланди.

Xiaomi Mi 9 маҳаллий бозорга 26 февралдан чиқарилади, бошқа мамлакатларга чиқиш вақти ва нархи ҳозирча номаълум. Ушбу компаниянинг бундан аввал тақдим этган Redmi Note 7 моделини ҳозирча фақат AliExpress’дан буюртма орқали сотиб олиш мумкин. Жаҳон бозорига чиқарилган айрим Xiaomi смартфонларини эса 819 000 сўмдан бошланувчи нархларда Terashop.uz интернет-дўконимиздан харид қилиш имкони бор. Айниқса, шу кунларда – акция доирасида бу харидингиз янада ёқимли ва манфаатли бўлади.