AnTuTu'да янги рекордчи!
Куни кеча Тайваннинг MediaTek компанияси ўзининг 7 нанометрли янги Dimensity 1000 5G чипини тақдим қилган эди.
5G модем, тўртта ядроли ARM Cortex-A77 асосий процессори ва Mali-G77 график процессоридан иборат чип AnTuTu эталон тестида синовдан ўтказилди ва умумий 511 363 балл билан ҳайратланарли натижа қайд этди.
Бу кўрсаткич Snapdragon 855+ билан жиҳозланган смартфонлар ва ҳаттоки Apple'нинг A13 Bionic чипида ишловчи iPhone'лариникидан ҳам яхшироқ. Маълумот учун, бенчмаркда Asus ROG Phone II 496 226, iPhone 11 Pro Max эса 456 065 балл йиғган эди.
Эътибор беринг, AnTuTu синтетик тест бўлиб, синов натижалари қурилманинг реал шароитда ишлашини 100 фоиз аниқ кўрсатмайди, лекин чипнинг қанчалар кучли эканлиги ҳақида тасаввур ҳосил қилишимизга ёрдам бера олади.
Тест натижасига яна эътибор қаратамиз. Dimensity 1000'нинг CPU'сига 161 266, GPU'сига эса 196 097 балл берилган. CPU қайд этган натижа AnTuTu'даги рекорд ҳисобланади. Чипнинг хотира бўлими 84 463, фойдаланувчи амалиёти (UX) эса 69 537 балл йиғган.
Юқоридаги натижалар ARM'нинг тўрт ядроли Cortex-А77 асосий процессори ва Mali-G77 график процессори битта чипда жамланса қандай бўлишини кўрсатади.
Dimensity 1000 5G биринчи бўлиб қайси смартфонга ўрнатилиши ҳозирча номаълум, лекин MediaTek'нинг маълум қилишича, ушбу чип ўрнатилган илк қурилмалар 2020 йилнинг I чорагидан чиқа бошлайди.
ЎҚИНГ: Honor V30 Pro флагмани тақдимотдан аввал AnTuTu’да ҳайратга солди!
